ရွှေချိန်ခွင် ( ၁ - ၂ )

(လယ်တီဆရာတော်တို့ ခေတ်က ဝန်ထောက်မင်း ဦးစောလှဖြူ-ဆိုသော ခရစ်ယာန်ဘာသာဝင် တစ်ယောက်သည် ရွှေချိန်ခွင်-အမည်ရှိ စာအုပ်တစ်အုပ် ထုတ်ဝေကာ ဗုဒ္ဓဘာသာနှင့် ခရစ်ယာန်ဘာသာကို နှိုင်းယှဉ်ပြခဲ့၏။ သို့ရာတွင် သူ၏ ဘက်လိုက်သော အမြင်များ၊ အလျင်စလို ကောက်ချက်ချမှုများကြောင့် ဗုဒ္ဓဘာသာဝင်တို့အား စော်ကားထားသလို ဖြစ်ခဲ့၏။ ထို့ကြောင့် မန္တလေးမြို့နေ ပညာဝန်ထောက် မောင်ကျော်ရန်ဆိုသူက ၎င်းရွှေချိန်ခွင်စာအုပ်ကို ရှင်းလင်းချက် ရေးပေးပါရန် လယ်တီဆရာတော်ထံ တောင်းပန်သဖြင့် “ရဟန်းတို့ သူတစ်ပါးတို့သည် ငါ၏ အပြစ်ကိုဖြစ်စေ တရား၏ အပြစ်ကိုဖြစ်စေ သံဃာ၏ အပြစ်ကိုဖြစ်စေ ပြောကြရာ၌ “ဤစကားသည် ဤအကြောင်းကြောင့်လည်း မဟုတ်၊ ဤအကြောင်းကြောင့် လည်း မမှန်၊ စင်စစ်အားဖြင့် ဤအပြစ်သည် ငါတို့၌ ထင်ရှားမရှိ” ဟု မဟုတ်သည်ကို မဟုတ်သည့်အတိုင်း သင်တို့ ဖြေရှင်းကြရမည်” (ဗြဟ္မဇာလသုတ်) ..ဟူသော ဘုရားရှင်၏ သြဝါဒတော်အတိုင်း လယ်တီဆရာတော် ဘုရားကြီးသည် နေမကောင်း သည့်ကြားက ဖြေရှင်းရေသားခဲ့ဘူး၏။ 

ရွှေချိန်ခွင်-ဟု ဆိုလျှင် အများစုက တောင်တွင်းကြီး သျှင်ဥက္ကဋ္ဌ-ရေးသော စာအုပ်ကိုသာ ဖတ်ဖူးကြ၏။ လယ်တီဆရာတော်ကြီး၏ စာအုပ်ကိုကား မသိသူသာ များ၏။ ယခုခေတ် ခရစ်ယာန်တို့သည်လည်း ဦးစောလှဖြူ ရေးသော ရွှေချိန်ခွင်စာအုပ်ပါ အချက်အလက်များဖြင့် ယခုခေတ် ဗုဒ္ဓဘာသာဝင်တို့အား စကားဖြင့် တိုက်ခိုက်အနိုင်ယူလေ့ ရှိ၏။ မြန်မာဗုဒ္ဓဘာသာဝင်များကား မိမိက သူတစ်ပါးဘာသာကို တိုက်ခိုက်လေ့ ဝေဘန်လေ့မရှိသလို မိမိဘာသာကို ဝေဘန်တိုက်ခိုက်လာလျှင်လည်း ပြန်လည်၍ မဖြေရှင်းတတ်သူများ၏။ လယ်တီဆရာတော်ကြီး၏ ဖြေရှင်းချက်များကို ဖတ်ဖူးထားလျှင် မိမိတို့ဘာသာကို စော်ကားဝေဘန်လာသည့်အခါ အကျိုးအကြောင်း ပြန်လည်ဖြေရှင်း ပြနိုင်ပါလိမ့်မည်။ (ထိုသို့ ပြန်လည်ဖြေရှင်းနိုင်ကြစေရန် ရည်ရွယ်၍ ဤ “ရွှေချိန်ခွင် ရှင်းလင်းချက်” ကို တင်ပြပါသည်။ ဘာသာရေး အဓိကရုဏ်းများ ဖြစ်ပွားစေရန် လှုံ့ဆော်ခြင်း မဟုတ်ပါ။) 

ခရစ်ယာန် ရွှေချိန်ခွင် အဆိုကိုဆရာတော်ရှင်းလင်းချက် 

ရွှေချိန်ခွင် အဆို (၁) 

၁။ (က) ခရစ်ယာန် ဘာသာက မသေ မနာ မအို ထာဝရဘုရား ရှိသည်ဟု ဆို၏။ 

(ခ ) ဗုဒ္ဓဘာသာက ယခု ဘုရားမရှိ- ဟု ဆို၏။ 

ဆရာတော် ရှင်းလင်းချက် 

ဘုရား၏ ကိုယ်တော်သည် ၁။ ရူပကာယကိုယ်တော် ၊ ၂။ ဓမ္မကာယကိုယ်တော် ဟူ၍ နှစ်ကိုယ်တော်ပါသည်။ 

၁။ ကုသိနာရုံပြည်၌ ပရိနိဗ္ဗာန်စံယူရာတွင် ချူပ်ငြိမ်းသော ခန္ဓာတော်ကို ရူပကာယကိုယ်တော် ခေါ်ပါသည်။ 

၂။ ဂုဏ်တော် ကျေးဇူးတော်အနန္တကိုလည်းကောင်း၊ ပိဋကတ်သုံးပုံတည်းဟူသော တရားတော် ကိုလည်းကောင်း ဓမ္မကာယ ကိုယ်တော် ခေါ်ပါသည်။ 

ထိုနှစ်ပါးတို့တွင်--- 

ရူပကာယကိုယ်တော်မှာ။ ။ အချို့သာ ချုပ်ငြိမ်းပါသည်။ သုံးကုဋေခြောက်သန်းမျှ မကသော ဆံတော်၊ သွားတော် လေးဆယ်၊ စွယ်တော်နှစ်စုံ၊ နဖူးသင်းကျစ်တော်၊ ညှပ်ရိုးတော် နှစ်ချောင်း၊ ရှစ်စရွက်မျှလောက်သော အရိုးတော်တို့မှဖြစ်သော ဓာတ်တော်ဟူသော ဤရူပကာယကိုယ်တော်တို့မှာမူကား ကမ္ဘာမြေပေါ်တွင် ယခုပင် အနှံ့အပြား ရှိလျက် ဖြစ်ပါသည်။ 

ဓမ္မကာယကိုယ်တော်မှာမူကား။ ။ ခံယူသူရှိပါသမျှ ကာလပတ်လုံး ဘယ်အခါမှ မကွယ်ပါ။ ခံယူသူရှိရာမှာ တည်ထွန်းပါသည်။ အကနိဋ္ဌခေါ်သော အထက်ကောင်းကင် ဘုံကြီး၌ကား မဟာကမ္ဘာကြီး တစ်သောင်းခြောက်ထောင်မက တည်ထွန်းလျက် ရှိနေပါသည်။ 

ထို့ကြောင့် “ဗုဒ္ဓဘာသာ၌ ယခုဘုရား မရှိ” ဆိုသော စကားသည် ဘုရား၏ ကိုယ်တော်နှစ်ပါးတွင် ပရိနိဗ္ဗာန်စံရာ၌ ချုပ်ငြိမ်းလေသော အချို့သော ရူပကာယကိုယ်တော် တစ်စိတ်မျှကိုသာ ရည်၍ ဆိုသော စကားဖြစ်ပါသည်။ အထက်၌ ပြခဲ့သော ဆံတော် အစရှိသော ရူပကာယကိုယ်တော်နှင့် ဓမ္မကာယကိုယ်တော်မြတ်များမှာ ယခု ထင်ရှားရှိပါသည်။ (ဦးစောလှဖြူဆိုတိုင်း ယခု ဘုရားလုံးလုံး မရှိသည်မဟုတ်ပါ။) 

ရွှေချိန်ခွင်အဆို (၂) 

၂။ (က) ခရစ်ယာန်ဘာသာက ဘုရား၌ အနန္တတန်ခိုးတော်ရှိ၍ မတတ်နိုင်သောအရာ တစ်စုံတစ်ခု မရှိ၊ ထို့ကြောင့် လူကို ကယ်မနိုင်သည်ဟု ဆို၏။ (ခ) ဗုဒ္ဓဘာသာကလည်း အနန္တတန်ခိုးတော် ရှိသည်ဟု ဆို၏။ ဆိုပြီးလျှင် ဘုရားသည် သူတစ်ပါးကို မ-မနိုင်၊ မိမိဖို့ကိုပင် မတတ်နိုင်၍ ဝဋ်ဆိုက်သေရသည် ဆို၏။ 

ဆရာတော် ရှင်းလင်းချက်

 “ခရစ်ယာန်ဘာသာက ဘုရား၌ အနန္တတန်ခိုးတော်ရှိ၍ မတတ်နိုင်သောအရာ တစ်စုံတစ်ခု မရှိ” ဟူသော စကားမှာ --- 

၁။ လောက၌ သေခြင်းသဘော မရှိရအောင် တတ်နိုင်ပါမည်လော။ ကမ္ဘာပေါ်တွင် ခရစ်ယာန်ဘာသာဝင်လူမျိုးတို့၏ သင်းချိုင်းသည် အနှံ့အပြားပင် ရှိလျက်ပါတကား။ 

၂။ မအိုရအောင် တတ်နိုင်ပါမည်လော။ ကမ္ဘာပေါ်တွင် ခရစ်ယာန်ဘာသာဝင် လူမျိုးတို့၏ ခေါင်းဖြူ စွယ်ကျိုးတွေ အနှံ့အပြားပင် ရှိလျက်ပါတကား။ 

၃။ နာခြင်းသဘော မရှိရအောင် တတ်နိုင်ပါမည်လော။ ကမ္ဘာမြေပေါ်တွင် ခရစ်ယာန်ဘာသာဝင် လူမျိုးတို့၏ အကျိုးတွေ အကန်းတွေ အနူတွေ အရွဲတွေ ထိုထိုရောဂါအနာ ကပ်ရောက်သူတွေ ဆရာဝန်တွေ ဆေးရုံတော်တွေ အနှံ့အပြားပင် ရှိလျက်ပါတကား။ 

၄။ လောက၌ မိုက်မဲသောသဘော မရှိရအောင် တတ်နိုင်ပါမည်လော။ ကမ္ဘာမြေပေါ်တွင် မိုက်မဲသောသူ သာ၍ ပေါများသည်တကား။ 

၅။ ခရစ်ယာန်ဘာသာကို မခံယူသူတစ်ယောက်မျှ တစ်ခဏချင်း မရှိရအောင် တတ်နိုင်ပါမည်လော။ ခရစ်ယာန်ဘာသာကို မခံယူသူ သာ၍ များသည်တကား။ 

၆။ ကမ္ဘာမြေပေါ်တွင် အရုပ်အဆင်း မလှသူ မရှိရအောင် တတ်နိုင်ပါမည်လော။ 

၇။ ဥစ္စာပစ္စည်းမွဲသူ မရှိရအောင် တတ်နိုင်ပါမည်လော။ 

၈။ ကမ္ဘာမြေပေါ်တွင် လူအားလုံး အညီအမျှ အသက်ရှည်ရှည်ချည်း နေရအောင် တတ်နိုင်ပါမည်လော။ 

၉။ ခရစ်ယာန်ဘာသာဝင် လူမျိုးတို့မှာ မွေးဖွားစနှင့် သေကြသည် မရှိပါသလော။ တစ်လတွင်သေသူ၊ တစ်နှစ်တွင်သေသူ စသည် မရှိပါသလော။ 

၁၀။ ကမ္ဘာမြေပေါ်၌ ရှိသမျှသော သတ္တဝါတွေကို ခဏချက်ချင်း နိဗ္ဗာန်ဘုံသို့ ရောက်အောင် ပြုနိုင်ပါမည်လော။ ဤသို့ စသည်ဖြင့် ကမ္ဘာမြေပေါ်တွင် မသင့်မမြတ်သော အမူအရာတွေ အနန္တရှိပါလျက် ထာဝရဘုရား မတတ်နိုင်၍ နေသောအရာတွေကို ဝန်ထောက်မင်း ဦးစောလှဖြူ မမြင်ပါသလော။ ( ထာဝရဘုရား ကယ်မနိုင်သောအရာ မရှိပါတကား) မိမိဘက်ပါအောင် ငွေနှင့်မျှားခြင်းကား ဘုရားတန်ခိုး မဟုတ် ဘာသာတစ်ပါးက ခရစ်ယာန်ဘာသာသို့ ဝင်သောသူကို စာဖြူဆရာတို့က ကြေးငွေပေးသည်။ အစိုးရ များထံ အားထုတ်၍ ပေးသည်။ သည်အရာများကို ထာဝရဘုရား စောင်မသည်ဟု စာဖြူဆရာများ ဟောပြော လေ့ရှိသည်။ လောက၌ နဂိုက ဓားပြမဟုတ်ဘဲ နောက်မှ ဓားပြကဲ့သို့ ဝင်လာသောသူကို အပေါင်းအသင်း များခြင်းကို အလိုရှိသော ဓားပြဟောင်းတို့က ပစ္စည်းဥစ္စာ အဝတ်ပုဆိုးပေးသည်။ သူခိုး သူခိုးချင်းလည်း ထို့အတူ၊ မုဆိုး မုဆိုးချင်း၊ တံငါ တံငါချင်း၊ သူတောင်းစား သူတောင်းစားချင်းလည်း ထို့အတူ၊ မိမိတို့ အသင်းအပင်းများခြင်းကို အလိုရှိသော သူတို့သဘောသည် မိမိတို့အလေ့အကျက်ကို ဝင်လာသောသူတို့ကို တတ်နိုင်သလောက် ချီးမြှောက် ထောက်ပံ့မြဲ လောကထုံးစံတည်း။ ဤသို့သော ထုံးစံဖြင့် များခြင်းကိုအလိုရှိသော စာဖြူဆရာတို့က စာဖြူသို့ မဝင်သောသူတို့ကို ဝင်ချင်အောင် တတ်နိုင်သလောက် ချီးမြှောက်ထောက်ပံ့သည်ကို ထာဝရဘုရားပေးသည် ကယ်မ-သည်ဟု ပြောဟောကြခြင်း သည် ဟုတ်နိုင်ပါမည်လော ။ (အဘယ်မှာ ထာဝရဘုရား ကယ်မ နိုင်သောအရာ ရှိပါသနည်း ။) ဂေါတမဘုရားရှင်၏ အနန္တတန်ခိုးတော်များ ငါတို့ဘုရားသည် အနန္တတန်ခိုးတော်ရှိသည် မှန်၏၊ ကောင်းကင် မြေ မိုး ပျံလျှိုးနိုင်၏၊ အနန္တကမ္ဘာ အနန္တစကြဝဠာ၌ ရှိသရွေ့ကို အကုန်အစင် မြင်နိုင်၏ ၊ ယူဇနာ တစ်ရာ တစ်ထောင်က အသံကြားနိုင်၏၊ သူတစ်ပါး စိတ်ကို အကုန်သိနိုင်၏၊ ကိုယ်တော်ကို နတ်ယောင် သိကြားယောင် ဗြဟ္မာယောင် တစ်ရာ တစ်ထောင်မက ခဏချင်းဖန်ဆင်းနိုင်၏၊ ဤသို့စသည်ဖြင့် သူတကာတို့မတတ်နိုင် ဘုရားသာတတ်နိုင်သော အရာသည် အနန္တများပြား၏ ။ 

(ထို့ကြောင့် ငါတို့ဘုရားမှာ တန်ခိုးတော်အနန္တရှိသည် ဆိုပါသည် ။) မအို မသေ အမြဲနေရအောင် ဘယ်ဘုရားမှ မတတ်နိုင် ကမ္ဘာမြေပေါ်တွင်ရှိသော သတ္တဝါတွေကို မသေဘဲနေနိုင်အောင် မအိုဘဲနေနိုင်အောင် မနာဘဲ နေနိုင်အောင် မသေဘဲနေနိုင်အောင် စသည်ဖြင့် အထက်ကဆိုခဲ့သော အရာများကိုမူကား ဘယ်ဘုရားမှပင် မတတ်နိုင်ကြ၊ မိမိတို့ခန္ဓာကိုလည်း မအို မသေ မနာအောင် မတတ်နိုင်ကြ နိဗ္ဗာန်ဘုံသို့ ရောက်သောကာလ မှသာ တတ်နိုင်ကြသည် ။ နိဗ္ဗာန်ရောက်မှ ဒုက္ခငြိမ်းမည် ငါတို့ဘုရားသည် နိဗ္ဗာန်ဘုံသို့ ရောက်တော်မူသော နေ့ကစ၍ မိမိကိုယ်ကိုလည်း မအို မသေ အမြဲနေရအောင် တတ်နိုင်ပါ၏ ။ နိဗ္ဗာန်ဘုံသို့ ရောက်လာသမျှသော သူအပေါင်းတို့ကို မအို မသေ အမြဲနေရအောင် တတ်နိုင်ပါ၏ ။ 

ကျမ်းကိုး- လယ်တီဆရာတော် သာသနဝိသောဓနီကျမ်း- 

ဒုတိယတွဲ (နှာ- ၁၀၀, ၁၀၁, ၁၀၂, ၁၀၃, ၁၀၄, ၁၀၅)

အရှင်ဝရသာမိ