ရွှေချိန်ခွင် ( ၅ - ၆ )

ရွှေချိန်ခွင်အဆို ၅- 

(က) ခရစ်ယာန်ဘာသာက ကိလေသာ တဏှာရာဂကို မြစ်တား၏ ။ 

(ခ) ဗုဒ္ဓဘာသာက မမြစ်တား ၊ ခွင့်ပြု၏ ၊ ခွင့်ပြုသောကြောင့် မိမိသဘောရှိသည့်အတိုင်း မယားများများ နေတတ်ကြ၏၊ ကွာရှင်းကြ၏၊ လောကမှသာ ခွင့်ပြုသည်အဟုတ်၊ နတ်ပြည်၌ နတ်သမီးငါးရာ၊ ခုနှစ်ရာ ဘုံခုနှစ်ဆင့်တွင် ခံစားစေသေး၏ ။ 

ဆရာတော် ရှင်လင်းချက် 

ဤစကားကို ဦးစောလှဖြူသည် ဗုဒ္ဓဘာသာနှင့် အလွန်ဝေးသူဖြစ်၍ ဆိုမိလေသည်။ ငါတို့ဘုရားသည်။ ။ ကိလေသာ တဏှာရာဂများကို မစင်ဘင်ပုပ်ထက်မက အလွန်စက်ဆုပ်တော် မူလှသည်၊ စက်ဆုပ်တော်မူသောကြောင့်ပင်လျှင် ထီးနန်းစည်းစိမ်ကို စွန့်ပစ်၍ တစ်ကိုယ်တော်တည်း တောထွက်တော်မူကြောင်း တပည့်သားရဟန်းတို့ကိုလည်း ကိလေသာ တဏှာရာဂတို့ိကို ကုန်စင်အောင် စွန့်ပစ်ခြင်းငှါ ဥစ္စာစီးပွား သားမယားနှင့် မစပ်ရကြောင်းကိုမျှ ဦးစောလှဖြူ မကြားဘူးဘဲ ရှိရလေသည်။ 

ယခုမျက်မြင်၌။ ။ တပည့်သားတော် အဆက်အနွယ်ဖြစ်၍ ကောင်းစွာကျင့်ပေးသော ရဟန်းတော် သံဃာတော်တွေ အနန္တရှိသည်ကိုမျှလည်း ဦးစောလှဖြူ အမြင်မျက်စိ မရှိရလေ ။ 

ကိလေသာအပေါင်းတို့တွင်- 

၁။ မြင်ကောင်းသော အရာကို မမြင်နိုင်ဘဲ မိုက်မဲဖုံးပိတ်၍နေသော မောဟကိလေသာနှင့် 

၂။ အမှားကိုးအားကျ၍ သွားတတ်သော ဒိဋ္ဌိကိလေသာသည် အဆိုးဆုံးဖြစ်ပါသည်။ ထိုကြောင့် မယားတစ်ယောက်မှပင် မယူငြားသော်လည်း ထိုကိလေသာကြီး နှစ်ပါးဖက်သို့ ပါသော သူသည် မယားတစ်ထောင်ယူသောသူထက်ပင် အပြစ်ကြီးလှသည်ဟု တရားတော်ရှိသည်။ မယားများများယူသောသူသည်။ ။ ဘုရာစကားကို  ကောင်းကောင်းကြီး နားမထောင်နိုင်သေးသော သူတို့သာတည်း၊ ဘုရာစကားကို ကောင်းကောင်း နားထောင်နိုင်သော သူတို့မှာမူကား ရဟန်းပြုကြရသည်။ နတ်ပြည်၌ နတ်သ္မီးငါးရာ ခုနှစ်ရာနှင့် စံစားခြင်းသည် နတ်ပြည်၏ အလေ့ပေတည်း၊ ဘုရားတရားနှင့် မစပ်၊ ဘုရားစက်ဆုပ်တော်မူသော အမှုသာတည်း ။ 

ပဉ္စမရွှွေချိန်ခွင်အဆို ရှင်းလင်းချက်ပြီး၏ ။ 

ရွှေချိန်ခွင်အဆို ၆- 

(က) ဗုဒ္ဓံသရဏံ ဂစ္ဆာမိ ၊ ဓမ္မံသရဏံ ဂစ္ဆာမိ ၊ သံဃံသရဏံ ဂစ္ဆာမိ- ဆိုသည့်အတိုင်း ခရစ်ယာန်ဘာသာမှာ ကိုးကွယ်ရာ သရဏံဂုံသုံးပါးရှိ၏ ၊ ထိုသုံးပါးသည်ကား ထာဝရမြတ်စွာဘုရားသခင် ရေရှုခရစ်တော်နှင့် ဝိညာဏ်တော်ဖြစ်၏။ 

(ခ) ဗုဒ္ဓဘာသာမှာ ထိုသုံးပါးအနက် တရားတစ်ပါးသာ ရှိသည် ဘုရားနှင့် သံဃာမရှိ၍ မစုံလင်။ 

ဆရာတော် ရှင်းလင်းချက် 

ခရစ်ယာန်ဘာသာမှာ သရဏံဂုံသုံးပါးနှင့် ပြည့်စုံသည်ဆို၍ သုံးပါးကို ပြရာမှာ--- 

၁။ ထာဝရဘုရားသခင် တစ်ပါး 

၂။ ရေရှုခရစ်တော် တစ်ပါး 

၃။ ဝိညာဏ်တော် တစ်ပါးကို ပြသည်။ ဤသုံးပါးကို ဦးစောလှဖြူကိုယ်တိုင် မြင်ဘူးသလော၊ မြင်ဘူးပါသည် ဆိုသူနှင့် တွေ့ဘူးရသလော။ ( စာတွေ့ မျှလောက်ကို အစွဲပြု၍ ပြောရှာရသည်။) 

ငါတို့မှာမူ။ ။ အထက် ပဌမစကားအချက်၌ ဆိုခဲ့ပြီးသော -- 

၁။ ဆံတော် သွားတော် စွယ်တော် အရိုးတော်တို့ကို ဘုရားပရိနိဗ္ဗာန်စံတော်မူသည့်နေ့မှစ၍ ယနေ့ထက်တိုင် ဆက်လက်မပြတ် စောင့်ရှောက်ကိုးကွယ်၍ လာကြသည်၊ အကျော်စေရ ဖြစ်တော်မူသော စေတီပုထိုးတွေ အထင်အရှားဖြစ်၍ ဘုရားလည်း မျက်မြင်ကိုယ်တွေ့ ဖြစ်သည်။ 

၂။ ပိဋကတ်သုံးပုံဟူသော တရားတော်လည်း အထင်အရှား ဖြစ်သည်။ 

၃။ ကလျာဏပုထုဇဉ် ဖြစ်ပေကုန်သော သမ္မုတိသံဃာတော်လည်း အထင်အရှားပင် ဖြစ်ပါသည်။ သူဆင်းရဲတစ်ယောက်ကို အိပ်၍ နေစဉ်အခါ စိတ်တန်းမိ တန်းရာနှင့် အထောင်တစ်ရာခန့်ရှိသော ရွှေပုံ ငွေပုံတွေကို အိပ်မက်မြင်မက်သည်ကို တကယ်မှတ်၍ ကစုန်း ကပွားထ၍ ကုဋေရှစ်ဆယ် ကြွဝသော သူဌေးကြီးထံ သွားပြီးလျှင် ယနေ့မှစ၍ ငါသူဌေးကြီး လုပ်မည်၊ သင်သူဌေးငယ်သာ လုပ်ရမည်ဟု ဆိုမှားသော သူနှင့် ခြားနားဦး မည်လော။ 

ဆဋ္ဌရွှေချိန်ခွင်အဆို ရှင်းလင်းချက်ပြီး၏။ 

ကျမ်းကိုး- လယ်တီဆရာတော် သာသနဝိသောဓနီကျမ်း-

ဒုတိယတွဲ (နှာ- ၁၁၁, ၁၁၂, ၁၁၃, ၁၁၄)

အရှင်ဝရသာမိ