ဆူးလေဦးမြင့်သိန်း ဦးဆောင်ခဲ့သည့် ထေရဝါဒအမည်ခံ အဓမ္မဝါဒ

၎င်းဂိုဏ်းကြီး၏ ပြန်လည်ကြီးထွားလာပုံမှာကား ကြောက်ခမန်းလိလိပင် ဖြစ်နေကြပါသည်။ မိတ္တူများက တစ်မျိုးဖြစ်၍ အသွင်ပြောင်းထားသည်တို့ကလည်း တစ်မျိုးလုပ်ထားကြပါသည်။

နေပြည်တော်တွင် တောင်ပိုင်းရော၊ မြောက်ပိုင်းပါ မိတ္တူဈေးကွက် ဖြန့်ကြက်ထားကြပါသည်။ ၂၀၀၇ ခုနှစ်တွင် နေပြည်တော်သို့ ရောက်ရှိခိုက် ကိုယ်တိုင် ကြုံတွေ့ခဲ့ရပါသည်။ ‘ဝိပဿနာညွန့်ပေါင်းကျမ်းကြီး’(တန်ဖိုး ကျပ် ၄၀၀၀)မှစ၍ ၎င်းဂိုဏ်းထုတ် မိတ္တူစာအုပ်များကို ဝယ်လိုလျှင် စာရင်းပေးကြရကြောင်း လေ့လာသိရှိခဲ့ရပါသည်။

ဟောပြောစည်းရုံးသူများလည်းရှိ၍ စာရင်းပေးရန် လွယ်ကူသော အဆက်အသွယ်ရှိကြောင်းလည်း သိခဲ့ရပါသည်။ ၎င်းဂိုဏ်းဝင်ဖြစ်သူ အမရပူရမြို့ဆရာကြိုင်ရေးသည့် ‘ဒွယနိဿိတပကာသနီကျမ်း’ တို့ကိုပင် မိတ္တူများ ရနိုင်ပါသည်။

ထေရဝါဒသမ္မာပထဝိဘဇ္ဖဝါဒီဖြစ်သောရန်ကုန်မြို့ဆူးလေဓမ္မကထိဆရာကြီး ဦးမြင့်သိန်းဟောကြားတော်မူအပ်သော သမ္မာပထဝိဘဇ္ဖအကြောင်းသတ် ထေရဝါဒတရားတော်များ

အမှတ်စဉ် (၁) နိဗ္ဗာန်နှင့် သံသရာစာအုပ်မျိုး၊

အမှတ်စဉ် (၂) ဂဟဏူပါဒါန်ဝါဒ ပဋိစ္စသမုပ္ပာဒ် သံသရာတရားတော်စာအုပ်မျိုး၊

ရွှေလရောင်ဓမ္မာစရိယ သင့်ဘဝဦးမြင့်သိန်းရေးသားသည့် သောတာပန်အလင်းကျမ်း ဒုတိယဆင့်) ပထမတွဲနှင့် ဒုတိယတွဲစာအုပ်မျိုးစသည်တို့ကိုလည်း မိတ္တူများ ရနိုင်ကြပါသည်။

၎င်းဂိုဏ်းကြီး၏ ဦးစီးဆရာတော်တစ်ပါးဖြစ်သူ မန္တလေးမြို့ ခင်မကန်တိုက်၊ အနန္တဂုဏ်ရည် စည်သာကျောင်း ဦးနာရဒရေးသားသည့် ထေရဝါဒဝိဘဇ္ဖဝါဒဝိပဿနာကျမ်းကြီးကို ၂၀၀၄ ခုနှစ်တွင် ထုတ်ဝေထားကြပါသည်။

ယင်းကျမ်း၏ အမှားများကို ပြဆိုလျက် ဆောင်းပါးရှင်အရှင်ဣန္ဒာစရိယာဘိဝံသက ဆောင်းပါး ၁၆ ပုဒ်တို့ကို ရေးသားတင်ပြခဲ့သော်လည်း အကြောင်းကြောင်းကြောင့် မည်သူကမျှ ဖော်ပြရန် မစီစဉ်နိုင်ကြပေ။ ယခုအခါတွင် ဓမ္မရံသီမဂ္ဂဇင်းအယ်ဒီတာအဖွဲ့ကဖော်ပြထားပါသည်။ ၂၀၀၈ ခုနှစ်တွင် သင်္ကန်းကျွန်း၌ နေသော ၎င်းဂိုဏ်းဝင်တစ်ပါး ရေးသားသည့် ဗျသနတရားငါးပါးအမည်ရှိ စာအုပ်တစ်အုပ်ကိုလည်း ဂိုဏ်းဝင်အလှူရှင်များက အရုဏ်ဆွမ်းလောင်းအသင်းနှင့်တွဲ၍ လောင်းလှူကြကြောင်း သိရ၊ ဖတ်ရပါသည်။ ဦးနာရဒနှင့်အတူ ဂိုဏ်းဦးဆောင်တပည့်ကြီးလေးပါးတို့ကို ဦးမြင့်သိန်းက သာသနာပြုရန် ချန်ထားခဲ့ကြောင်း သိရပါသည်။ ထိုလေးပါးတို့တွင် ဓမ္မစေတီဆရာတော် ဦးကောသလ္လ၏ဆရာဖြစ်သူ ဦးဥက္ကံသဗုဒ္ဓိလည်း တစ်ပါးပင်ဖြစ်ကြောင်း သိရပါသည်။

၎င်းဆရာတော်ကမွေးထုတ်လိုက်သူဦးကောသလ္လသည်လည်း

၎င်းဂိုဏ်းတရားတို့ကိုပင် ဟောပြောလျက်ရှိပါသည်။ တရားခွေပြန့်ပွားစေရေးအတွက် လူများကို အဖွဲ့များ ဖွဲ့စေလျက် တရားစိတ်ဝင်စားသော ချမ်းသာသူများကို စုံစမ်းချဉ်းကပ်ပြီး တရားနာယူစေကာ ကြည်ညိုစေပြီးမှ တရားခွေတစ်စုံလျှင် ကျပ် ၄၀၀၀၀ စသည်ဖြင့် သာသနာပြုကြောင်းလည်း သိရပါသည်။ စင်စစ်အားဖြင့် ဆူးလေဦးမြင့်သိန်းသည် အဓမ္မဝါဒဆုံးဖြတ်ခံရသူဖြစ်၍သာလျှင် ဦးမြင့်သိန်း၏ ထေရဝါဒအမည်ခံ အဓမ္မဝါဒဟူ၍ မှတ်တမ်းတင်ရခြင်းသာ ဖြစ်ပါသည်။ 

အမှန်ကမူ ဂိုဏ်းဦးစီးခေါင်းဆောင်မှာ ဓမ္မစေတီဆရာတော်ကြီး (ဒီပဲယင်းကျောက်စာတိုင်ဆရာတော်ကြီး)ဟူ၍ ရှိပါသေးသည်။ သိလိုပါက ‘ဝိပဿနာညွန့်ပေါင်းကျမ်းကြီး’တွင် လေ့လာကြည့်ကြပါကုန်။

ယင်းဆရာတော်ကြီးကို အကြောင်းပြု၍ ‘ဓမ္မစေတီဦးကောသလ္လ’ ဟု ဘွဲ့ခံထားကြောင်းလည်း သိရှိရပါသည်။ ၎င်းဂိုဏ်းကြီး၏ မူလနာမည်အပြည့်အစုံမှာ ‘ထေရဝါဒ ဝိဘဇ္ဖဝါဒ သမ္မပထကြောင်းသတ် ဝိပဿနာဂိုဏ်း’ဟူ၍ ဖြစ်ပါသည်။ ယင်းကို ပြုပြင်လျက် အသွင်သစ်ဖြင့် နာမည်တပ်သောအခါတွင်ကား ‘ထေရဝါဒဒဿနသမ္ပဒါနည်း’ ဟူ၍ ဖြစ်လာကြောင်းလည်း သိရပါသည်။ အဓမ္မဝါဒဖြစ်ကြောင်း ကြေငြာတားမြစ်ထားပြီးသည့် မိစ္ဆာဝါဒကြီးများတွင် ဆူးလေဦးမြင့်သိန်းဂိုဏ်းဆိုရာ အဓမ္မဝါဒသည် အမှတ်(၆) အဖြစ် ပါဝင်ပါသည်။

၎င်းအဓမ္မဝါဒဂိုဏ်းကြီးနှင့် အဓမ္မဝါဒတရားများ မည်မျှလောက်အထိ ပြန်လည်ကြီးထွားလာကြောင်းမှာ အထူးတင်ပြဖွယ်မရှိပြီ။

၁၉၈၂ခုနှစ်ကပင်ဆူးလေဦးမြင့်သိန်းဝါဒရှိသူတို့ကို

အဓမ္မဝါဒီအဖြစ် ဆုံးဖြတ်ထားပြီးဖြစ်ကြောင်း သိရပါသည်။