ဘာသာရေးကို ခုတုံးလုပ်ကာ အယောင်ဆောင် အလှူခံနေကြသူများ

၂-၁၂-၂၀၀၉ ရက်နေ့ နံနက် ၁၁ နာရီအချိန် မျက်မြင်တွေ့သူများက သူေတော်စင် ဝတ်စုံ ချွတ်လဲနေမှု့ကို သတင်းပေးခဲ့သည့် အတွက် သင်္ဃန်းကျွန်း ရဲစခန်းမှ ဒုရဲအုပ် လှမင်းအောင်နှင့် အဖွဲ့သည် သတင်းရရှိရာ သင်္ဃန်းကျွန်းမြို့နယ်၊ သုဝဏ္ဏအောင်ဆုထူးပန် ရပ်ကွက်၊ အား/ကာ အိမ်ရာဝန်းရှိ ရေစင်အောက်သို့ သွားရောက် စစ်စေခဲ့သည်။ ရေစင်အောက်သို့ ရောက်သောအခါ လူဝတ်မှ သူတော်စင် ဝတ်စုံချွတ်လဲထားသူကို မတွေ့ရသဖြင့် ဒေသခံများ၏ အကူညီဖြင့် လိုက်လံရှာဖွေရာ မွန်းလွဲ ၂ နာရီ ၁၅ မိနစ်အချိန်၌ လူဝတ်လဲလှယ် ဝတ်ဆင်နေစဉ် ပက်ပင်းတွေ့ရှိခဲ့ရ၏။ တွေ့ရှိ ဖမ်းမိသူမှာ ဒဂုံမြို့သစ် (တောင်ပိုင်း) ၇-ရပ်ကွက်၊ ရွှေစင်လမ်းနေ ဝေဖြိုး (ခ) ဖြိုးဝေအောင် (၂၄) နှစ် နှင့် ဒဂုံမြို့သစ် (တောင်ပိုင်း) ကျည်စုကျေးရွာနေ ဝင်းစိုး (ခ) အောင်ဝင်းစိုး (၂၇) နှစ် တို့ဖြစ်၏။ စစ်ဆေးချက်အရ ၎င်းတို့သည် သူတော်စင်အဖြစ် အယောင်ဆောင်၍ နေ့စဉ် အလှူခံနေကြောင်း ဝန်ခံခဲ့ကြ၏။ ၎င်းတို့ နှစ်ဦးအား သုဝဏ္ဏရဲစခန်းမှ (ပ) ၃၂၉/၂၀၀၉ ပြစ်မှုပုဒ်မ ၂၉၅/၂၉၅-က ဖြင့် ဖမ်းဆီးအရေးယူထားကြောင်း သိရပါသည်။  ( အမှတ် (၆၂၉) ၁၁-ရက် ဒီဇင်ဘာလ ၂၀၀၉ ခုနှစ် သောကြာနေ့ထုတ်၊ မူခင်းဂျာနယ်၊ စာမျက်နှာ ၆ တွင် ပါရှိသော သတင်းမှန်ဖြစ်ပါသည်) ကားဖြင့် လှည့်လှယ်၍ အလှူခံကြသူများ ရန်ကုန်မြို့တွင်း နှင့် အခြားသော မြို့နယ်များတွင် ကားဖြင့် လှည့်လှည်၍ အလှူခံနေကြသူများကို စာဖတ်သူများ တွေ့ဘူးကြပါလိမ့်မည်။ ထိုသို့ အလှူခံနေကြသူများသည် တချို့ အမှန်ကန် ရှိသော်လည်း လိမ်လည်၍ အလှူခံနေကြသူများ မြောက်မြားစွာ ရှိပေသည်။ မြန်မာနိုင်ငံတွင် ဖြစ်ပွားခဲ့သော နာဂစ် ဆိုင်းကလုန်း မုန်းတိုင်းတိုက်ခတ်အပြီးတွင် စာရေးသူ ကိုယ်တိုင် ကြုံတွေ့ခဲ့ဘူးပါသည်။ ကမာရွတ်မြို့နယ်တွင် ဆွမ်းခံကြွနေခိုက် စာရေးသူ ဆွမ်းအမ အိမ်၌ ရောက်ရှိနေစဉ် လမ်းပေါ်မှာ ကားဖြင့်လှည့်လည်၍ အလှူခံနေသူများသည် ထိုအိမ်ရှေ့သို့ ရောက်ရှိကာ နာဂစ်ကြောင့် ပျက်စီးသွားသော ကျောင်းအား ပြန်လည်ပြုပြင်ရန် မတတ်နိုင်သည့်အတွက် ရပ်ကွက်တွင်းသို့ ကားဖြင့် လှည့်လည်ကာ အလှူခံနေကြောင်း သိရ၏။ ထိုအကြောင်းအရာတို့ကို သိရှိကာ စာရေးသူ၏ ဆွမ်းအမ မှ ထိုပျက်စီးသွားသော ကျောင်းအား ပြန်လည်ပြုပြင်ပေးပါမည် ဟု ဆိုကာ ထိုအလှူခံကားဆီမှ ကျောင်းလိပ်စာတို့ကို တောင်းခဲ့ပါသည်။ နောက်တနေ့တွင် ထိုအလှူခံကား မှ ပေးသွားသည့် လိပ်စာအတိုင်း စာရေးသူ၏ ဆွမ်းအမ နှစ်ဥိး ကားဖြင့် ရွှေပြည်သာမြို့နယ် သို့ သွားရောက်ခဲ့ကြပါသည်။ အလှူခံကား ပေးသွားသော ရွှေပြည်သာမြို့နယ်အတွင်းမှ ကျောင်းလိပ်စာမှာ မှန်ကန်ခဲ့ပါသည်။ နာဂစ်ကြောင့် သွပ်အမိုးများပျက်စီးခဲ့သည် ဆိုတာလည်း မှန်ကန်ပါသည်။ သို့သော် ထိုကျောင်းမှ ဆရာတော်၏ ပြောကြားချက်အရ ဆရာတော်တို့၏ ကျောင်းမှ ထိုကဲ့သို့ မြို့တွင်း ရပ်ကွင်းတွင်းသို့ လှည့်လည်၍ အလှူခံခြင်း ဘယ်တုံးကမှ မလုပ်ခဲ့ပါဟု သိရပေ၏။ ထိုအခါကျမှ ကျောင်းနာမည်ကို အသုံးချကာ ရပ်ကွက်တွင်းသို့ လှည့်လည်၍ လိမ်လည်ကာ အလှူခံနေကြကြောင်း ဝမ်းနည်းစွာ တွေ့မြင်ခဲ့ရပါသည်။ ထိုကဲ့သို့သော လိမ်လည်၍ အလှူခံနေကြသူများ မြောက်မြားစွာ ရှိနေတာကိုတော့ ဗုဒ္ဓဘာသာဝင် ဒကာ ဒကာမများ သတိပြုသင့်ပေသည်။ အမျိုးသမီးများကို အဓိက ပစ်မှတ်ထားတတ်ကြ သင်္ကန်းဝတ်၍ အယောင်ဆောင် အလှူခံကြသူများသည် အရှက်အကြောက်ကြီးသော မြန်မာအမျိုးသမီးများအား အဓိက ပစ်မှတ်ထားတတ်ကြ၏။ ရန်ကုန်မြို့တွင်း ဆူးလေ၊ သိမ်ကြီးဈေး၊ ဗိုလ်ချုပ်ဈေး တဝိုက်တွင် တွေ့ရတတ်ပါသည်။ လူစည်ကားသော နေရာများမှာ အမျိုးသမီးများ ရှေ့တွင် အတင်းပိတ်ကာ ရပ်လျက် အတင်းအကျပ် အလှူခံတတ်ကြပါသည်။ တချို့ အမျိုးသမီးများ ရှက်တတ် ကြောက်တတ်ကြသဖြင့် မလှူချင်သော်လည်းပဲ လှူကြရတာကိုတွေ့ဘူးကြပါလိမ့်မည်။ တချို့ အချီကြီးကြံကာ အလှူခံကြသော အတုယောင်များလည်း ရှိပေသေး၏။ ဖိနပ်ပြတ်ကြီးကို ကိုင်လျက် ဒကာကြီး ဖိနပ်ပြတ်သွားလို့ပါ ဒကာမကြီး ဖိနပ်ပြတ်သွားလို့ပါ ဟုဆိုကာ ဖိနပ်ဖိုးကို အတင်းအကျပ် အလှူခံကြပါသည်။ စာရေးသူ ဆူးလေဘုရား အနီးတဝိုက်တွင် ကိစ္စတခုဖြင့် ကျောင်းသားတစ်ယောက်နှင့် သွားရောက်စဉ် စာရေးသူနှင့် အတူပါလာသော ကျောင်းသားအား ဖိနပ်ပြတ်ကြီးကို ပြလျက် ဖိနပ်ဖိုး အလှူခံတာကို တွေ့ခဲ့ဘူး၏။ ထိုသည်ကို စာရေးသူမှ ကိုယ်တော် ဖိနပ်စီးစရာ မရှိလျင် ကျောင်းလိုက်ခဲ့ ကျောင်းရောက်လျင် လှူပါမည် ဒီလိုလိုက်ပြီး အလှူမခံပါ နှင့် မသင့်တော်ပါ ဟုပြောကာ ခေါ်ခဲ့ပါသည်။ အနည်းငယ်မျှ စာရေးသူတို့၏ နောက်ကို လိုက်ခဲ့ပါသေးသည် စာရေးသူတို့ ရှေ့သို့ မဲ၍ လမ်းလျှောက်နေစဉ် နောက်မှ လိုက်လာသော ထိုရဟန်းအတုယောင် ဘယ်ကို ထွက်ပြေးလိုက်မှန်း မသိခဲ့ပါ။ ထိုကဲ့သို့ ဘာသာရေးကို ခုတုံးလုပ်ကာ လိမ်လည်၍ အလှူခံကြသူများလည်း မြန်မာပြည်တွင်း မြောက်မြားစွာ ရှိနေကြပါသည်။ ခရီးသွားရင်းလည်း  လမ်းမှာ ကိုရင်လေးတွေ အသက်ကြီးကြီး ကိုယ်တော်အတုယောင်တွေ အလှူခံတာနဲ့မတူ တောင်းရမ်းနေ သလိုတွေ့မြင်ဘူးကြပါလိမ့်မည် စာအိပ်တွေမှာ ဘာကျောင်းညာကျောင်းဆိုပြီး ခေါင်းစဉ်တပ် ခရီးသွားတွေအပေါ်လှူချင်မှန်းမသိ မလှူချင်မှန်းမသိ အတင်းလိုက်တင် မလှူရင်လည်း အတင်းအလှူခံတာမျိုးတွေ မြောက်များစွာ ရှိနေပါသေးသည် . .တကယ်တော့ ထိုကဲ့သို့ အလှူခံနေသူများသည် ကျောင်းမရှိ အိမ်မရှိ သူများ များပါသည်။ စားပေါက်ချောင်တာကို သိပြီး ကိုယ်တိုင် သင်္ကန်းကို ပတ်၍ သာသနာတော်ကိုအကြည်ညို ပျက်စေအောင် လိမ်လည်အလှူခံ နေကြသူများသာ ဖြစ်ပါသည် .. အထက်ပါ တင်ပြချက်များသည် အောက်ခြေပိုင်းမှ အတုယောင်များ၏ သာသနာဖျက်မူ့ပင် ဖြစ်ပါသည်။ ထို့အတူပင် အဆင့်မြင့်ပိုင်းမှာ သာသနာဖျက်များလည်း များစွာပေါ်ပေါက်နေပါသည် ဘုရားဟော တရားတော်များကို ဖျက်ဆီး၍ လူတို့ကို လိမ်လည်ကာ ဂိုဏ်းထောင်နေကြသော မိုးပြာဂိုဏ်း၊ ဓမ္မစေတီ ဂိုဏ်း၊ လူသေလူဖြစ် စသောဂိုဏ်းများ၊ ထမိန်ကို သာသနာ့အလံလုပ်ကာ ဘာသာရေးကို ခုတုံးလုပ် ဂိုဏ်းဂဏ ထောင်ကာ လိမ်လည်နေကြသူများလည်း ကြောက်စရာကောင်းလောက်အောင်ပင် သာသနာတွင်း၌ ပေါ်ပေါက်နေကြောင်းကိုလည်း ဗုဒ္ဓဘာသာဝင် သူတော်စင် သူတော်ကောင်းများ သိစေရန် အပြုသဘောဆောင်ကာ အသိပေး တင်ပြအပ်ပါသည်။