ဗုဒ္ဓဝါဒ ဟူသည် လူငယ်များကို ဥိးစားပေးသောဝါဒ၊ လူငယ်များကို နေရာပေးသော ဝါဒပင် ဖြစ်ပေသည်။ မြတ်စွာဘုရားသည် တရားဟောတော်မူရာ၌ အရှင်သာရိပုတ္တရာ နှင့် အရှင်မောဂ္ဂလာန်တို့ကို လကျ်ာလက်ဝဲရံ၍ ရှေ့ဆုံးတန်းမှာ နေရာပေးတော်မူပါသည်။ ဒုတိယတန်း၌မူ အညာသိကောဏ္ဍည မထေရ်ကြီးက မြတ်စွာဘုရား၏ နောက်တည့်တည့်မှ ထိုင်ရပြီး ထိုမထေရ်ကြီး၏ လက်ဝဲလက်ျာ၌ သံဃာတော်များ နေရာယူကြရပေသည်။ သက်တော်ရ မထေရ်ကြီးကို နောက်မှာထားပြီး အဂ္ဂသာဝက နှစ်ပါးကို ရှေ့ဆုံးတန်းမှာ ဝန်းရံထား ခြင်းသည် အရည်အချင်းရှိသော လူငယ်များအပေါ်ထားရှိသော ဗုဒ္ဓ၏ စိတ်နေသဘောထားကို ဖော်ပြလိုက်ခြင်းပင် ဖြစ်ပေသည်။
ဤသာဓက ကို ကြည့်ရှူ့၍ ဗုဒ္ဓဝါဒ သည် လူငယ်များကို ဦးစားပေးသော ဝါဒ ဖြစ်ကြောင်း သိသာထင်ရှား လှပေသည်။ လူငယ်များသည် သွက်လက်သည်၊ ထက်မြက်သည်၊ ရိုးသားသည်၊ ကြိုးစားသည်၊ နိုးကြားသည်၊ တိုးပွါးသည်၊ သစ္စာကို မြတ်နိုးသည်၊ ဓမ္မကို မြတ်နိုးသည်၊ သစ္စာကို မြတ်နိုးရာ ဓမ္မကို မြတ်နိုးရာတို့၌ လူငယ်နှင့် လူကြီး လုံးဝမတူညီပေ။ လူငယ်များသည် လူကြီးများထက် ဣန္ဒြေသိက္ခာနှင့် ကိုယ်ကျင့်တရားဘက်က အားနည်းသူများ ရှိကောင်းရှိပေလိမ့်မည်။ သစ္စာကို မြတ်နိုးရာ ဓမ္မကို မြတ်နိုးရာ၌ကား လူကြီးများက လူငယ်များကို လုံးဝမမှီနိုင်၊ လုံးဝမယှဉ်နိုင်ပါပေ။ ထိုလူငယ်များ သစ္စာလမ်းမပေါ်၌ မားမားမတ်မတ် ရပ်တည်နိုင်ရန်၊ ဓမ္မလမ်းကြောင်းအတိုင်း ဖြောင့်ဖြောင့်တန်းတန်း လျှောက်လှမ်းနိုင်ရန် အကောင်းဆုံးသော နည်းလမ်းမှာ ရေဆန်ကို လှော်ခတ်ပြခြင်းပင် ဖြစ်ပါသည်။ ရေဆန်ကို လှော်ခတ်ရာ၌ သတိရှိရသည်၊ ဝိရိယရှိရသည်၊ အားမာန်သတ္တိတို့ အပြည့်အဝရှိရသည်။ စိတ်ဓာတ်ကြံ့ခိုင်ရသည်၊ ဇွဲကြီးရသည်၊ အကြံဉာဏ် ကောင်းရသည်၊ သို့မှသာ လိုရာခရီးသို့ အရောက်တက်လှမ်းနိုင်မည် ဖြစ်ပေသည်။
ဗုဒ္ဓဝါဒ အရ သာသနာပြုခြင်းဆိုသည်မှာ ရေဆန်ကို လှော်ခတ်ခြင်းပင် ဖြစ်သည်။ ရေဆန်ကို လှော်ခတ်ခြင်းဟူသည် လောကရေစီးကြောင်းအတိုင်း လိုက်ပါမသွားဘဲ ဗုဒ္ဓမျက်နှာကိုသာ ကြည့်ရှူ့၍ အလုပ်လုပ်ရခြင်း ဖြစ်ပေ၏။ လောကရေစီးကြောင်းဆိုသည်မှာ လာဘသက္ကာယ သိလောကကြောင့် အဂတိတရား လိုက်စားခြင်း၊ ဘုရားမျက်နှာမကြည့်ဘဲ အများမျက်နှာကိုသာ ကြည့်ရှူ့ခြင်း၊ ဓမ္မ ကို မျက်ကွယ်ပြုခြင်းပင် ဖြစ်ပေသည်။
သာသနာတော်ကြီး ရေရှည်တည်တံ့လိုပါလျှင် လောကရေစီးကြောင်းကို ပြောင်းပြန်ကူးခတ် နိုင်ရပေလိမ့်မည်။ ထိုသို့ ပြောင်းပြန်ကူးရန် စွမ်းနိုင်သူများမှာ လူငယ်များပင် ဖြစ်ပေသည်။ လောကရေစီးကြောင်းကို ပြောင်းပြန်လှော်ခတ်ခြင်းနှင့် ပတ်သက်၍ ဦးဇင်းတို့ ငယ်စဉ်က ပညာသင်ရာကြားခဲ့သော မစိုးရိမ်တိုက်သစ်ရှိ မဟာနာယက ဆရာတော် ဦးရာဇဓမ္မာဘိဝံသ အမြဲကျင့်သုံးပြီး အမြဲသြဝါဒပေးလေ့ရှိသည့် ဆောင်ပုဒ်လေး တခုရှိပေသည်။ ထိုဆောင်ပုဒ်မှာ “ မင်းတို့လိမ္မာဖို့ ငါမိုက်ပြမည်” ဟူ၍ ဖြစ်ပါသည်။ ထိုဆောင်ပုဒ်အတိုင်းပင် ဆရာတော် ဦးရာဇဓမ္မ သည် တပည့်များကို အုပ်ချုပ်ရာ၌ ခပ်မာမာ ခပ်တင်းတင်း အုပ်ချုပ်လေ့ရှိပါ၏။ ထိုသို့ စည်းကမ်းတင်းကြပ်စွာ အုပ်ချုပ်သော်လည်း တပည့်များက ဆရာတော်၏ စိတ်နေသဘောထားနှင့် စေတနာအရင်းခံကို သိထားပြီး ဖြစ်သောကြောင့် ဆရာတော်အား ချစ်ကြောက်ရိုသေသောအားဖြင့် ကြည်ညိုလေးစား အားထားကြသည်ကို တွေရှိရပေသည်။ သို့ဖြစ်၍ အနာဂတ်သာသနာကို သန့်ရှင်းဝင်းပစွာ မြင်လိုပါလျှင် အမိုက်ခံပြီး စောင့်ရှောက်မည့် လူငယ်များ အစဉ်မပြတ် မွေးဖွါးနိုင်ဖို့ အရေးတကြီး လိုအပ်လှပေ၏။ ဘာသာ သာသနာကို ထိပါးလာလျှင် မခံချင်သော၊ ဓမ္မကို အစွန်းအထင်း မခံလိုသော၊ ဓမ္မနယ်မြေကို တစ်လက်မမျှ အပွန်းပဲ မခံနိုင်သော သွက်လက်ထက်မြက်သည့် လူငယ်များ ပေါ်ပေါက်လာဖို့ လိုအပ်လှပေ၏။ သို့သော် လူငယ်များ သတိထားရမည်မှာ “ဝိဇ္ဖာ”ဆိုသည့် လေးစားလောက်သည့် အရည်အချင်း ရှိရမည်။ “စရဏ” ဆိုသည့် ကိုယ်ကျင့်တရား၊ ဝိရိယတရားနှင့် ဣန္ဒြေသိက္ခာပြည်စုံရပေမည်။ သို့မှသာ အနာဂတ်သာသနာကို ပုခုံးပြောင်း၍ ထမ်းဆောင်နိုင်ပေလိမ့်မည်။ သို့မဟုတ်လျှင်မူ လူငယ်များ၏ ဓမ္မကို မြတ်နိုးသည့်စိတ်၊ သစ္စာကို မြတ်နိုးသည့်စိတ်နှင့် အားမာန်သတ္တိတို့သည် တိမ်မြုတ်ပျောက်ကွယ်သွားပေလိမ့်မည်။ ထိုအခါ မျှော်လင့်ချက်မရှိတော့သည့် မျိုးဆက်ကြီးနှင့် ထူးမခြားနားပင် လောကရေစီးကြောင်းပေါ်တွင် အရှက်မဲ့စွာ မျောပါရလေတော့မည်။ ထိုသို့ဆိုလျှင် သာသနာသည် အဘယ်သို့ ရေရှည်တည်တန့် နိုင်ပါတော့မည်နည်း။ ထိုကြောင့် လူငယ်များကို ဝိဇ္ဖာနှင့် ပြည့်စုံဖို့၊ စရဏ နှင့် ပြည့်စုံဖို့ တိုက်တွန်းရခြင်း ဖြစ်ပါ၏။
0 comments:
Post a Comment
ဂုဏ်သိက္ခာရှိရှိ ပညာရှင်ဆန်ဆန် အပြုသဘောဆောင်တဲ့ comment ပေးမယ်လို့
သင့်ကို ယုံကြည်ပါသည်၊