သူရဿတီမယ်တော် ဆိုတာဘယ်သူလဲ

သူရဿတီမယ်တော် ဆိုတာ တကယ်ရှိသလား မရှိဘူးလား ဆိုတာတော့ တိတိကျကျ မတွေ့ရပါဘူး

သိရသလောက်တော့ သူရဿတီ ဆိုတာ အိန္ဒိယက ဟိန္ဒူ ယဉ်ကျေးမူ့ ဗုဒ္ဓဘာသာ နဲ့ ရောပါလာတာကို

တချို့ မြန်မာတွေက ဗုဒ္ဓဘာသာ ယဉ်ကျေးမူ့ ထင်မှတ်ပြီး ကိုးကွယ်နေကြတယ်လို့ ထင်ပါတယ်

ဟိန္ဒူဗြဟ္မဏဘာသာ မှာ နတ်ဘုရားသုံးဆူ ရှိပါတယ်။

မဟာဗြဟ္မာ၊ ဗိဿနိုး၊ သိ၀ လို့ ခေါ်ကြပါတယ်၊

မဟာဗြဟ္မာ က ကမ္ဘာလောက နဲ့ သတ္တဝါတွေကို ဖန်ဆင်းတယ်လို့ ဆိုပါတယ်။

ဗိဿနိုးက လောကကို ထိန်းသိမ်းစောင့် ရှောက်ပါတယ်

သိ၀ က ဖျက်ဆီးပါတယ်။

ဖန်ဆင်းရှင် မဟာဗြဟ္မာ ရဲ့ ကြင်ရာတော်က ဆရဆွတီ၊

ပါဠိဘာသာ နဲ့တော့ သရဿတီ

အများခေါ်ကြတာက သူရဿတီ၊

ဗိဿနိုး ရဲ့ ကြင်ယာတော်က လက္ချမီ၊

သိ၀ ရဲ့ ကြင်ယာတော်က ပဗ္ဗတီ  အဲဒီလို အသီးသီး ရှိကြပါတယ်။

မဟာဗြဟ္မာ ရဲ့ စီးတော်ယာဉ်က ဟံဆ၊ ပါဠိ လို ဟံသ မြန်မာလိုတော့ ဟသာၤ

သူရဿတီ မှာတော့ စိးတော်ယာဉ် ရှိတယ်လို့ မတွေ့မိပါဘူး

သို့သော်လည်း မဟာဗြဟ္မာ မှာ  စီးတော်ယာဉ်ရှိနေရင် သူ့ရဲ့ ကြင်ယာတော် သူရဿတီမှာ

ယာဉ်သီခြားရှိဖို့ မလိုတော့ပါဘူး။ ဒါဟာ လောက သဘာ၀ ပါပဲ

ဟံသ ဆိုတဲ့ စကားကို အိန္ဒိယ က swan လို့ အင်္ဂလိပ် လို ဘာသာပြန်ကြပါတယ်

swan ကို မြန်မာက ငန်း၊ ငန်းဘဲ လို့ မြန်မာမူ ပြုကြပါတယ်။

ဒီတော့ ပင်ရင်းကျတဲ့ အိန္ဒိယ သားတို့ အယူအဆကို လက်ခံရမယ်ထင်ပါတယ် ပြီးတော့ အိန္ဒိယ က

မဟာဗြဟ္မာ ရုပ်ပုံတွေမှာလဲ စိးတော်ယာဉ်ကို ငန်းဘဲ ရုပ်နဲ့ ပဲ ပြထားပါတယ်။

နောက်တခု ဆရာသမားပြောပြထားလို့ ကြားဘူးတာလေး ရှိပါသေးတယ်။

တိကျသေချာတဲ့ အထောက်အထားတော့ စာရေးသူ မပြနိုင်ပါဘူး။ သူရဿတီ ဟာ လင်ကောင်မပေါ်ဘဲ မွေးလာတဲ့

သူလို့ ဆိုပါတယ်။ သူ့ကို အမျိုးယုတ်တယ် ဆိုပြီး မြစ်ထဲမှာ သစ်ဖောင်ကလေးပေါ်တင်ပြီး

ငန်းဘဲ တစ်ကောင်နဲ့ အတူ မျှောလိုက်ပါတယ်၊ မြစ်ထဲမှာ မျှောချင်ရာ မျှောနေပြီး တနေ့မှာ

ပုဏ္ဏားတွေ နေတဲ့ ရွာတရွာမှာ သောင်တင်ခဲ့ပါတယ်၊ ထိုနှစ်မှာပဲ အဲဒီရွာလေးမှာ သီနှံ စပါး များ ခါတိုင်း

နှစ်များနှင့် မတူဘဲ အထွက်တိုးပြီး စီးပွါးဖြစ်ခဲ့တဲ့ အချိန်နဲ့ တိုက်ဆိုင်ခဲ့ပါတယ်

အသိညဏ် မဖွံ့ဖြိုးသေးတဲ့ ရွာသားတွေဟာ ဒီကောင်မလေး ရောက်လာလို့ ငါတို့ရွာမှာ

ဆန်ရေစပါး ရတာ သူဟာတန်ခိုးရှင်ပဲ လို့ သတ်မှတ်ပြီး ကိုးကွယ်ကြပါတယ်

နောင်ကြာလာတဲ့ အခါမှာ အိန္ဒိယရှိ ပုဏ္ဏားတွေက  သူ့ကို ဗေဒင် ဝေဒ သုံးပုံကို စောင့် ရှောက်တဲ့ သူလို့

လုပ်ကြံဖန်တီးပြီး ကိုးကွယ်မူပြုကြပြန်ပါတယ်

လိုရင်းကတော့ အခုပြောခဲ့တဲ သူရဿတီ ဟာ ဗုဒ္ဓဘာသာနဲ့ လုံး၀ မသက်ဆိုင်ဘူးဆိုတာ

စာပေလေ့လာလိုက်စားတဲ့ သူတိုင်းသိကြပါတယ်။

မြန်မာပြည်ထဲမှာ

ထို ဆိုခဲ့တဲ့ သူရဿတီ ဟာ မြန်မာပြည်ထဲကို ဘယ်လိုရောက်လာတယ်

မသိပါဘူး မြန်မာပြည်မှာတော့ ဟင်္သာစီးလျက် တွေ့ရပါတယ်

ရင်နာစရာ ကောင်းတာက သူရဿတီ ဟာ ပိဋကတ် သုံးပုံကို စောင့်ရှောက်

တယ် လို့ လွဲမှာစွာ ပြောဆိုကြတာပါပဲ၊ ပိဋကတ်သုံးပုံဆိုတာ သာသနာတော်

စောင့်ရှောက်နေကြတဲ့ ရဟန်းသံဃာတော်များသာ စောင့်ရှောက်နိုင်ပါတယ်။

ပိဋကတ်စာအုပ်တွေကို ဗီရိုထဲ အလှပြထားရုံနဲ့ စောင့်ရှောက်တယ် မမည်ပါဘူး။

ဘုရားဟော ပိဋကတ်တွေကို သင်အံ လေ့ကျက် ကျင့်ကြံအားထုတ်ပြီး ဘုရားဟောအတိုင်း

ဟောပြောပြသနေမှသာ ပိဋကတ်တော်တွေကို စောင့်ရှောက်နိုင်မှာပါ။

သာသနာ နဲ့ ပတ်သက်တဲ့ သက်ဆိုင်ရာ ပုဂ္ဂိုလ်တွေက

မရှင်းလင်းကြတဲ့ အတွက်ကြောင့် တချို့ ဗုဒ္ဓဘာသာ စာအုပ်တွေထဲမှာ

သူရဿတီဂါထာ ဆိုပြီး ထိုဂါထာကို ရွတ်ရင် စာမေးပွဲအောင်မယ် အန္တရာယ်ကင်းမယ် စတဲ့

မဟုတ်မမှန်တာတွေပြောထားပြီး အမွန်းတင်ထားတာတွေလဲ အများကြီးတွေ့ဘူးကြပါလိမ့်မယ်

နာမည်အကြီးဆုံး ဘုရားတဆူ ဖြစ်တဲ့ ဗိုလ်တစ်ထောင် ဘုရားမှာ

သူရဿတီ ကို ထည်ထည်ဝါဝါ ကို လုပ်ပေးထားတာကလည်း

စိတ်မကောင်းစရာပါပဲ ဒါကို မသိဘဲ မြန်မာတွေ က သူ့ကို

ပိဋကတ် သုံးပုံစောင့်ရှောက်တဲ့ သူဆိုပြီး မှားယွင်းစွာနဲ့ ကိုးကွယ်မူ

ပြုကြပါတယ် မိမိဟာ ဗုဒ္ဓဘာသာဝင်စစ်စစ်ပါဆိုရင်တော့ လုံး၀ မကိုးကွယ်ထိုက်ပါဘူးလို့ ဆိုပါရစေ။

စာရေးသူ ဆွမ်းခံကြွတဲ့ အိမ်တအိမ်မှာ ဘုရားစင်ဘေးမှာ စင်တခုနဲ့ ထားပြီး

ကိုးကွယ်ထားတာ တွေ့လို့ ဘာကြောင့် ကိုးကွယ်တာလဲ မေးတဲ့အခါ ပိဋကတ်သုံးပုံစောင့်တဲ့

သူရဿတီဆိုပြီး ပြောလို့ သူရဿတီ ရဲ့ သမိုင်းကြောင်းကို သေချာရှင်းပြပြီး

မကိုးကွယ်ဖို့ ဟောပြောဘူးပါတယ်။ သို့သော်လည်း အချည်းနှီးပါပဲ

ဘိုးဘွားအစဉ်အဆက် ကိုးကွယ်လာတာဖြစ်လို့ မစွန့်လွတ်နိုင်ပါဘူးတဲ့။

ဘုရားရှေ့မှာ ဗုဒ္ဓံ သရဏံ ဂစ္ဆာမိလုပ်ပြီးတော့ အခြားသော သာသနာပ ကိုးကွယ်မှု့များကို

ဘုရားစင်ဘေးမှာ ထားပြီး ရှိခိုးပူဇော်မှု့ပြုနေကြတာတွေ တွေ့ရတာ တယ်ဟန်မကျလှပါဘူး။

ဟိန္ဒူအယူဝါဒ ကို ကိုးကွယ်တဲ့ သူလား ဗုဒ္ဓဘာသာစစ်စစ် ကို ကိုးကွယ်တဲ့သူလားဆိုတာတော့

မြန်မာတွေ မိမိကိုယ်ကို ဆန်းစစ်တတ်ဖို့ လိုပါတယ်။

အရှင်ဝရသာမိ 

https://shinsami.blogspot.com