မိုးပြာ ဦးဉာဏသည် ပစ္စုပ္ပန်ကမ္မဝါဒ အယူရှိသူပီပီ နောက်ဘ၀ မရှိလိုသူ ဖြစ်၏။ ဦးဉာဏသည် ဘုရားကို
စော်ကား၊ တရားကိုစော်ကား၊ သံဃာကို စော်ကားနေသူဖြစ်သဖြင့် သူအတွက်နောက်ဘဝမရှိလေ
ကောင်းလေသူဖြစ်၏။ ထို့အပြင် သူကိုယ်တိုင် ဘုရားရှင်အား အယုံအကြည်မရှိသူ မဟုတ် သူ၏
နောက်လိုက်များကိုလည်း အယုံအကြည်မရှိအောင် စည်းရုံးသိမ်းသွင်း၍ နေလေ၏။ မိုးပြာဝါဒကို
လက်ခံသူများသည် ဗုဒ္ဓဘာသာဟုသာ အမည်ခံထားသော်လည်း ဘုရားရှင်အား ရှိခိုးခြင်းအမှု့ကို လုံးဝ
မပြုကြောင်း သိရပေ၏။ စုံစမ်း၍ ရသလောက် သိရသည်မှာ သူ၏ စည်းရုံးမှု့ သူ၏နောက်လိုက်
နောက်ပါများ၏ စည်းရုံးမှု့ကြောင့် ကချင်ပြည်နယ် မြစ်ကြီးနား၊ မိုညင်း ဒေသတဝိုက်တွင်းလည်းကောင်း၊
ရှမ်းပြည်နယ် အောင်ပန်း နှင့် အခြားသော မြို့ရွာများတွင်လည်းကောင်း၊ မန္တလေး၊ စစ်ကိုင်းနှင့်
မုံရွာဒေသတဝိုက်တွင်လည်းကောင်း မိုးပြာဝါဒ ကို တချို့ရွာလုံးကျွတ်ပင် ပြောင်းလဲသွားသည်ဟု
သိရှိရပေ၏။ နာမည်ရ နိုင်ငံရေးပါတီတစ်ခုမှ လူကြီးပိုင်းများသည်ပင် မြစ်ကြီးနားထောင်ထဲတွင်
သူ၏ စည်းရုံးမှု့ကြောင့် မိုးပြာဝါဒ ကို လက်ခံ၍ ပြောင်းသွားကြသည်ဟု သိရပါ၏။
မိုးပြာဝါဒကို လက်ခံသူ မှန်သမျှသည် ထိုဝါဒကို ခံယူပြီးသည်မှစ၍ အိမ်တွင် ဘုရားစင်
ထားရှိခြင်းကို လုံးဝမပြုလုပ်ဟု သိရပေ၏။ ထိုကဲ့သို့ ဖြစ်အောင်လည်း ဦးဉာဏနှင့် သူ၏
အပေါင်းပါတို့က စည်းရုံးကြလေသည်။ ဦးဉာဏသည် ဘုရားရှင်အား အမျိုးမျိုးကဲ့ရဲ့စော်ကားနေသော်လည်း သူ၏ဂိုဏ်းတွင်မူ
သူ့ကိုယ်သူ ဗုဒ္ဓဘာသာပုရုသျှ (ဘုရား) ဟူသော အမည်ကို ခံယူကာ ဘုရားရှင်အား
ရှိခိုးနေသူများကို ကဲ့ရဲ့ ရှုတ်ချ၍ ဘုရားရှင်အား ပယ်ထုတ်ဖို့ ကြိုးစားနေသည်ကို
သူရေးသားသော စာအုပ်များတွင် တွေ့နိုင်ပါ၏။
********************************************************
ဦးဉာဏ - က
''တရားမမြင်သူတွေဟာ ဘုရားကိုမြင်နေသူတွေပဲ။ တရားမမြင်သူတွေဟာ ဘုရားကိုမြင်ဖို့
ဘုရားချီးကျူး စာတွေနဲ့ ဘုရားဟောစာတွေကို ဖတ်ပြီး ဝတ်တက်ဖူးမြင်သော်လည်း ဘုရာမမြင်နိုင်ဘူးလို့
အဓိပ္ပါယ်ရတယ်။ ဘုရားမမြင် ဘဲ ဝတ်တက် ဝတ်ပြုသူနှင့် ဘုရားဖူးနေခြင်းဟာ ဘုရားရဲ့အပြောအဆိုခံရတဲ့
ရဟန်းလို သိပ်တုန်လှုပ်သွားခံရဖို့ ဖြစ်လိမ့်မယ်။ အဲဒီရဟန်းဟာ ဘယ်လောက်တုန်လှုပ်သလဲဆိုရင်
ကြိုးစွဲချပြီး သေသွားတဲ့အထိဖြစ်တယ်လို့သိရတယ်။ များစွာဝမ်းနည်းဖွယ်ပဲ။''
( ဦးဉာဏ၏ ဘုရား၊ စာ-၂ဝ၄ )
''သူစကားပြောနိုင်မှု နိဂုံးချုပ်ခါနီးမယ် ရှင်အာနန္ဒာကို ဖြေကြားခဲ့တဲ့ စကားရှိတယ်။
စကား''အာနန္ဒာသင်တို့ ကို တရားတွေလည်း ငါဟောခဲ့ပြီ၊ ဝိနည်းတွေလည်းငါပညတ်ခဲ့ပြီ၊
ဒါတွေဟာ ငါလွန်ပြီးနောက် သင်တို့ရဲ့ ဆရာ ဘုရားပဲ'' လို့ဖြစ်တယ်။''
စေတီလေးမျိုး
ဒါကိုကြည့်ရင် ဘုရားမရှိတော့ဘဲ တရားဟာဘုရားပဲလို့ အမှတ်ပြုတာ စဉ်းစားစရာပဲ။
ဒီလိုအမှတ်ပြုပြီး ဒီစေတီတွေကို ရှိခိုးနေတာလည်း ဘုရားအလို ဘယ်လောက်ကျမလဲ။
ဘုရားဟာ စေတီတိုက်တာတွေကို ညွှန်ပြခဲ့ဖူး တယ်။ လေးခုတောင်ရှိတယ်။
သူဟောပြောတဲ့ ဓမ္မတွေဟာလည်း စေတီတစ်ခုဖြစ်တယ်။ သူအသုံးအဆောင်ကျောင်း၊
သင်္ကန်းစသာတွေဟာလည်း စေတီတစ်ခုဖြစ်တယ်။
သူ့ရဲ့ကိုယ်ကြွင်း ကိုယ်ကျန်တွေလည်း စေတီတစ်ခုဖြစ်တယ်။ သူ့အထိန်းအမှတ် လုပ်ထားတဲ့ကျောင်းတိုင်
အုတ်တိုင် အဆောက်အဦးတစ်ခုခုလည်း စေတီတစ်ခုဖြစ်တယ်။ အခုဆိုရင်တော့ သူ့ရုပ်လုံး ရုပ်ပုံတွေလည်း
အဲဒီစေတီထဲပါမှာပေါ့။ ဒါပေမယ့် ဘုရားခေတ်က အဲဒီသူတွေရဲ့ ရုပ်ထု၊ ရုပ်လုံးတွေ လုပ်ကြတဲ့
အလေ့အထရှိပုံမရဘူး။ လူသေပြီး နှစ်လေးငါးရာကြာမှ သူ့ရုပ်ထု၊ ရုပ်လုံးစပေါ်တာ သိရတယ်။
အခုအခါမှာတော့ ဒါတွေက ဘာသာရေးပစ္စည်းအဖြစ် ရှိခိုးဦးတင်ဖို့ မရှိမဖြစ်သလို ဖြစ်နေတယ်။
( ဘုရား၊ စာ- ၂ဝ၆/၇ )
စေတီထက်က်ကိုးကွယ်စရာ ဘုရားညွန်ပြ
ဘုရားဟာ ဒါတွေကိုဒီလိုမျှော်လင့်ဖို့ရှိတယ်။ စေတီအဖြစ်ထိုက်တန်ပုံ ဟောခဲ့တယ်ဆိုပေမယ့်
လေးစားစရာ တစ်ခုလောက်ထပ် ပိုဖို့မရှိဘူး။ သူဟောခဲ့တဲ့ဓမ္မပိုဒ် တစ်ခုက ဒါကိုညွှန်နေတယ်။
အဲဒါက ကိုယ့်ကိုသာ ကိုယ့်ရဲ့ကိုးကွယ် ရာဖြစ်တယ်။ တခြားဘယ်သူ့ကိုးကွယ်ရာဖြစ်ပါမလဲ။ ကိုယ်ကသာ
ယဉ်ကျေးပြီးရင် ရခဲ့တဲ့ ကိုးကွယ်ရာကိုရတာပဲလို့ ဖြစ်တယ်။
ဘုရားဟာသူမရှိတဲ့နောက် သူ့ကိုကိုးကွယ်ဖို့ မညွှန်ကြားတာ ဒီစကားကသိသာတယ်။ သူ့အသက်ရှိ
ထင်စဉ်မှာ တောင် သူ့ကိုကိုးကွယ်ဖို့ မညွှန်ဘဲ ကိုယ့်ကိုယ်ကိုးကွယ်ဖို့ ညွှန်တာတွေ့ရတယ်မဟုတ်လား။''
( ဘုရား၊ စာ- ၂ဝ၇/၈ )
++++++++++++++++++++++++++++++++++++++
ဦးဉာဏ၏ အထက်ပါဟောပြောချက်တို့ကို ခြုံးကြည့်လျှင် -
၁ - နေ့စဉ် ပုံမှန် ဘုရားဝတ်တက် ဝတ်ပြုလုပ်နေသူများကို ကဲ့ရဲ့ခြင်း၊
၂ - သုတ်၊ ဝိနည်း၊ အဘိဓမ္မာဟာ ငါမရှိတဲ့နောက် သင်တို့ရဲ့ဆရာဘုရားပဲ ''ဟူသော စကားကို ကဲ့ရဲ့ခြင်း၊
၃ - စေတီဟာ လေးစားစရာ တစ်ခုထက်ပိုဖို့ မရှိဘူး ''ဟုဆိုကာ စေတီတော်ကို
အထင်သေးဖွယ်အဖြစ် ပြောကြားခြင်း၊
၄ - ဘုရားသည် ကိုးကွယ်ရာမဟုတ်၊ ကိုယ့်ကိုယ်ကိုသာ ကိုးကွယ်ရာ'
ဟုဟောပြောခြင်းများတွေ့ရပါသည်။
****************************************
ဦးဏ၏ အထက်ပါဟောပြောချက်တို့ကို ဘုရားရှင်မိန့်ကြားထားသော
စကားတော်တို့နှင့် တိုက်ဆိုင် ကြည့်သောအခါ
မြတ်စွာဘုရားက မဟာပရိနိဗ္ဗာနသုတ်၌ -
စတ္တာရိမာနိ အာနန္ဒ သဒ္ဓဿ ကုလပုတ္တဿ ဒဿနီယာနိ သံဝေဇနီယာနိ ဌာနာနိ။ ။ ပ ။
သဗ္ဗေတေ ကာယဿ ဘေဒါ ပရံ မရဏ သုဂတိံ သဂ္ဂံ လောကံ ဥပပဇ္ဇိဿန္တီတိ။
( ဒီ၊ ၂၊ ၁၁၆ )
ထိုအခါ မြတ်စွာဘုရားသည် ''အာနန္ဒာကား ကြည်ညိုမြတ်နိုးဖွယ်ဖြစ်သည့် ရဟန်းတို့ကို
ငါးဖူးမြော်ခွင့် ရတော့မည် မဟုတ်'ဟုကြံစည်ပူပန်နေ၏၊ ယခုအခါ အာနန္ဒာအား ငါဘုရားသည်
ကြည်ညိုမြတ်နိုးဖွယ်ဖြစ်သည့် ရဟန်းတို့ကို ဖူးမြော်ခွင့် အလွယ်နှင့် ရနိုင်မည့်ဌာနကို ကြားပေအံ့၊
ယင်းအရပ်၌ နေလတ်သော် ထိုထိုဤဤ မလှည့်လည်ရပဲ ကြည်ညိုမြတ်နိုးဖွယ်ဖြစ်သည့် ရဟန်းတို့ကို
အလွယ်နှင့် ဖူးမြော်ခွင့် ရပေလိမ့်မည် ''ဟု ကြံစည်ဆင်ခြင် တော်မူပြီးလျှင်
အရှင်အာနန္ဒမထေရ်ကို -
ချစ်သားအာနန္ဒာ သဒ္ဓါတရားနှင့်ပြည့်စုံသော အမျိုးကောင်းသားအဖို့ရာ ဖူးမြော်ထိုက်၍
ယင်းသို့ဖူးမြော် ထိုက်သသူအား သံဝေဂရစေမည့်ဌာနတို့သည် လေးပါးရှိကုန်၏။
လေးပါးတို့ဟူသည်မှာ -
(၁) ချစ်သားအာနန္ဒာ . . လုမ္ဗီနီအင်ကြင်းတောဌာနသည်
''ဤဌာန၌ မြတ်စွာဘုရား ဖွားမြင်တော်မူ၏''ဟု ကြံစည် အောက်မေ့ကာ သဒ္ဓါတရားနှင့် ပြည့်စုံသော
အမျိုးကောင်းသားအဖို့ရာ ဖူးမြော်ထိုက်၍ ယင်းသို့ဖူးမြော် သသူအား သံဝေဂရစေမည့် ဌာနတပါးဖြစ်သည်။
(၂) ချစ်သားအာနန္ဒာ . . မဟာဗောဓိ မဏ္ဍိုင်ဌာနသည်
''ဤဌာန၌ မြတ်စွာဘုရားသည် အမြတ်ဆုံးသော သမ္မာသမ္ဗောဓိဉာဏ်တော်ကို ရတော်မူ၏''ဟု
ကြံစည်အောက်မေ့ကာ သဒ္ဓါတရားနှင့် ပြည့်စုံသော အမျိုးကောင်း သား အဖို့ရာ ဖူးမြော်ထိုက်၍
ယင်းသို့ဖူးမြော်သသူအား သံဝေဂရစေမည့် ဌာနတပါးဖြစ်သည်။
(၃) ချစ်သားအာနန္ဒာ . . မိဂဒါဝုန် တောအရပ်သည် ''ဤဌာန၌ မြတ်စွာဘုရားသည်
အမြတ်ဆုံးဖြစ်သော တရားတော်ဓမ္မစက်ကို ဟောမြွက်လည်စေတော်မူ၏ ''ဟု ကြံစည်အောက်မေ့ကာ
သဒ္ဓါတရားနှင့်ပြည့်စုံသော အမျိုးကောင်းသားအဖို့ရာ ဖူးမြော်ထိုက်၍ ယင်းသို့ဖူးမြော်သသူအား
သံဝေဂရစေမည့် ဌာနတပါးဖြစ်သည်။
(၄) ချစ်သားအာနန္ဒာ၊ ကုသိနာရုံပြည်အရပ်သည်
''ဤဌာန၌ မြတ်စွာဘုရားသည် ခန္ဓာကြွင်းမရှိသော ငြိမ်းခြင်း သဘော=
အနုပါဒိသေသနိဗ္ဗာနဓာတ်ဖြင့် ပရိနိဗ္ဗာန် ဝင်စံတော်မူ၏ ''ဟု
ကြံစည်အောက်မေ့ကာ သဒ္ဓါတရားနှင့် ပြည့်စုံ သော အမျိုးကောင်းသားအဖို့ရာ ဖူးမြော်ထိုက်၍
ယင်းသို့ဖူးမြော်သသူအား သံဝေဂရစေမည့် ဌာနတပါးဖြစ်သည်။
ချစ်သားအာနန္ဒာ . . သဒ္ဓါတရားနှင့်ပြည့်စုံသော အမျိုးကောင်းသားအဖို့ရာ ဖူးမြော်ထိုက်၍
ယင်းသို့ ဖူးမြော်သသူအား သံဝေဂရစေမည့် ဌာနတို့သည် ဤလေးပါးတို့ပေတည်း။
ချစ်သားအာနန္ဒာ . . သဒ္ဓါတရားနှင့် ပြည့်စုံသော ရဟန်းယောကျာ်း, ရဟန်းမိန်းမ,
ဥပသကာယောကျာ်း, ဥပသိကာမိန်းမများသည် -
(၁) ဤလုမ္ဗိနီဌာန၌ မြတ်စွာဘုရားဖွားမြင်တောမူ၏''ဟူ၍လည်းကောင်း၊
(၂) ဤမဟာဗောဓိဌာန၌ မြတ်စွာဘုရားသည် အမြတ်ဆုံးဖြစ်သော သမ္မာသမ္ဗောဓိဉာဏ်ကို
ရတော် မူ၏''ဟူ၍လည်းကောင်း၊
(၃) ဤမိဂဒါဝုန်ဌာန၌ မြတ်စွာဘုရားသည် အမြတ်ဆုံးဖြစ်သော တရားတော်ဓမ္မစက်ကို
ဟောမြွက်လည်စေ တော်မူ၏ '' ဟူ၍လည်းကောင်း၊
(၄) ဤကုသိနာရုံဌာန၌ မြတ်စွာဘုရားသည် ခန္ဓာကြွင်းမရှိသော
ငြိမ်းခြင်းသဘော=အနုပါဒိသေသနိဗ္ဗာန ဓာတ်ဖြင့် ပရိနိဗ္ဗာန် ဝင်စံတော်မူ၏ " ဟူ၍
လည်းကောင်း ကြံစည်အောက်မေ့ကြလျက် လာရောက်ကြလိမ့်မည်။
ချစ်သားအာနန္ဒာ . . စေတီပုထိုးတို့ကို ဖူးမြော်ရန် သွားလာလှည့်လည်ကြသော သူတို့သည်
ကြည်ညိုသော စိတ်ရှိလျက် သေကြကုန်လျှင် ထိုသူအားတို့သည် ကိုယ်ခန္ဓာပြတ်ကြွေ စုတေသည်မှ
နောက်ကာလ၌ ကောင်းသော လားရာ နတ်ရွာသုဂတိသို့ ရောက်ရှိကြလိမ့်မည်"
ဟုမိန့်တော်မူထားပါသည်။
( မဟာဗုဒ္ဓဝင်၊ ပဉ္စမတွဲ၊ စာ-၄၃၇။ ၈ )
တတ္ထ စေတိယ စာရိကံ အာဟိဏ္ဍန္တာတိ ယေစ တာဝ တတ္ထ တတ္ထ စေတိယင်္ဂဏံ သမ္မဇ္ဇန္တာယ
အာသနာနိ ဓောဝန္တာ ဗောဓိမှိ ဥဒကံ သိဉ္စိန္တာ အာဟိဏ္ဍန္တိ၊ တေသု ဝတ္တဗ္ဗမေဝ နတ္ထိ။ အသုကဝိဟာရေ
ဒဒစေတိယံ ဝန္ဒိဿာမာဒဒတိ နိက္ခမိတွာ ပသန္နစိတ္တာ အန္တရာ ကာလံ ကရောန္တာပိ အနန္တရာယေန သဂ္ဂေ
ပတိဌာဟိဿန္တိယေဝါတိ ဒဿေတိ။
( ဒီ၊ ဌ၊ ၂၊ ၁၇၃ )
ရဟန်းတို့သည် စေတီရင်ပြင်ကို တံမြက်စည်းလှည်းကြ၍ နေရာတို့ကို သုတ်သင်ရှင်းလင်းကြ၏။
ဗောဓိပင်၌ ရေကိုသွန်းလောင်းကြ၍ လှည့်လည်ကြ၏။ ထိုရဟန်းတို့၌ ဆိုဖွယ်ပင်မရှိတော့ပေ။
ငါတို့သည် ဤမည်သော ကျောင်း၌ ရှိသည့်စေတီတော်ကို ရှိခိုးကြမည်ဟု နှလုံးသွင်း၍ ကျောင်းမှ ထွက်ခွါလာရာ
ကြည်လင်သော စိတ်ရှိကြ၍ စေတီ မရောက်မီ လမ်းခရီးကြား၌ သေကြသော ပုဂ္ဂိုလ်တို့သည်ပင်
အန္တရာယ်မရှိဘဲ နတ်ပြည်သို့ ရောက်ကြ၏ " ဟု မိန့်ဆိုထားပါသည်။
ဝိမာနဝတ္ထု၊ ဣတ္ထိဝိမာန၊ ပီတဝိမာနဝတ္ထု၌
-
တာဝတိံသာနတ်ပြည်၌ အခြားခြားသော နတ်သမီးများထက် အရောင်အဆင်းအားဖြင့်
လှပတင့်တယ်သည့် ရွှေဝါရောင်နတ်သမီးတစ်ဦးရှိ၏။ ထိုနတ်သမီး၏ လှပတင့်တယ်မှုတို့ကို ကြည့်ပြီး
သိကြားမင်းက -
"သင်ဟာ လူ့ဘဝတုန်းက ဘယ်လိုကုသိုလ်ကောင်းမှုတွေပြုခဲ့လို့ ဒီလိုအကျိုးတွေ ရရှိခံစားရသလဲ" ဟု
မေးသည့် အခါ နတ်သမီးက -
လူ့ပြည်တုန်းက သပွတ်ခါးပန်း လေးပွင့်ကို စေတီမှာ ပူဇော်ဖို့ ယူဆောင်လာစဉ် စေတီမရောက်ခင်
လမ်းမှာပဲ နွားဝှေ့လို့ သေခဲ့ရပါတယ်။ စေတီကိုသာ အရောက်သွားပြီး ပူဇော်ခဲ့ရရင် ဒါထက်မက
သာလွန်တဲ့စည်းစိမ် ချမ်းသာတွေ ရနိုင် ပြည့်စုံနိုင်ပါတယ်။ စေတီတော်ကို ပန်းတွေနှင့် ပူဇော်ဖို့သွားတဲ့
ပုဗ္ဗစေတနာကုသိုလ်ကြောင့် ဒီလို အကျိုးတွေ ခံစားရတာပါ။ သိကြားမင်းရဲ့ အသင်းဝင်
အပေါင်းအဖော်ဖြစ်ရတာပါ " ဟုဖြေကြား၏။
ထိုအခါ သိကြားမင်းက မာတလိအား -
" မာတလိ နတ်သား၊ အံသြဖွယ်လည်းကောင်း၊ ဆန်းလည်း ဆန်းကြယ်သော ဒီကုသိုလ်ရဲ့ အကျိုးကို
ကြည့်လိုက်စမ်းပါ၊ ရှာစမ်းပါ။ လှူဖွယ်ဝတ္ထု အနည်းငယ်ပင် ဖြစ်ပေမယ့် ကောင်းကျိုးတွေကတော့
များမြတ်လှပါတယ်။ ကြီးမားလှပါတယ်။
မြတ်စွာဘုရားနှင့် တပည့်သားသံဃာတော်တို့၌ ကြည်ညိုတဲ့စိတ်ရှိရင် လှူဖွယ်ဟာ
နည်းတယ်ဆိုတာမရှိဘူး။
မာတလိ လာခဲ့၊ ငါတို့လည်း မြတ်စွာဘုရားရဲ့ ဓာတ်တော်တွေကို အတိုင်းထက်အလွန် ပူဇော်ကြစို့၊
ကုသိုလ်ကောင်းမှု တွေကို ဆည်းပူးတာဟာ ချမ်းသာတယ်။
သက်တော်ထင်ရှား ဘုရားပဲဖြစ်စေ၊ ပရိနိဗ္ဗာန် စံတော်မူသွားကြတဲ့ ဘုရားပဲဖြစ်စေ
စိတ်ထားညီမျှရင် အကျိုးပေး ညီမျှတယ်။ စိတ်ထားကောင်းခြင်းကြောင့် သတ္တဝါတွေ
သုဂတိသို့ရောက်ကြတယ်။ မြတ်စွာဘုရားတို့ဟာ သတ္တဝါတွေ အကျိုးအတွက် ပွင့်တော်မူကြတာပါ။
အဲဒီမြတ်စွာဘုရား၌ ရိုသေမြတ်နိုး ရှိခိုးပူဇော်တဲ့အတွက် နတ်ပြည်သို့ ရောက်ကြရတယ်။''ဟု ပြောကြားလေ၏။
( ဝိမာန၊ ၆၅ )
တစ်ဖန်မြတ်စွာဘုရားက -
'' ယထာ ခေါ အာနန္ဒ ရညော စက္ကဝတ္တိဿ သရီရေ ပဋိပဇ္ဇန္တိ။ ဧဝံ တထာဂတဿ သရီရေ
ပဋိပဇ္ဇိတဗ္ဗံ၊ စာတုမဟာပထေ တထာဂတဿ ထူပေါ ကာတဗ္ဗော။ တတ္ထ ယေ မာလံဝါ ဂန္ဓံ ဝါ စုဏ္ဏကံဝါ
အာရောပေဿန္တိဝါ အဘိဝါဒေဿန္တိဝါ စိတ္တံဝါ ပသာဒေဿန္တိ၊ တေသံ တံ ဘဝိဿတိ ဒီဃရတ္တံ ဟိတာယ
သုခါယ။
( ဒီ၊ ၂၊ ၁၁၇ )
အာနန္ဒာ မြတ်စွာဘုရား၏ အလောင်းကိုလည်း စကြာဝတေးမင်း၏ အလောင်းကဲ့သို့ပင်
ဆောင်ရွက်၍ လမ်းမ လေးခွ ဆုံရာအရပ်၌ စေတီတည်ထားအပ်၏။ ယင်းသို့ တည်ထားခြင်းဖြင့် ထိုစေတီ၌
ပန်း, နံ့သာ, နံ့သာမှုံ့တို့ တင်လှူခြင်း၊ ကြည်ညိုခြင်း၊ ရှိခိုးပူဇော်ခြင်း ပြုသူတို့အား ချမ်းသာစီးပွား
တိုးပွားပေလိမ့်မည်။ ''
'' စတ္တာရော မေ အာနန္ဒ ထူပါရဟာ။ ကတမေ စတ္တာရော တထာဂတော အရဟံ သမ္ဗာသမ္ဗုဒ္ဓေါ
ထူပါရဟော။ ပစ္စေက သမ္ဗုဒ္ဓေါ ထူပါရဟော၊ တထာဂတဿ သာဝကော ထူပါရဟော၊ ရာဇာ စက္ကဝတ္တီ
ထူပါရဟောတိ''။ ( ဒီ၊ ၂၊ ၁၁၇ )
အာနန္ဒာ -
၁။ ဘုရား။
၂။ ပစ္စေကဗုဒ္ဓါ။
၃။ ဘုရား၏တပည့်သာဝက။
၄။ စကြဝတေးမင်း အားဖြင့် လေးပါးသောပုဂ္ဂိုလ်တို့ကို စေတီတည်ထိုက်ကုန်၏။
ထိုစေတီ၌ ကြည်ညိုစိတ် ဖြစ်ပေါ်စေသူများသည် သေသောအခါ ကောင်းရာသုဂတိသို့ရောက်နိုင်၏ ''ဟု
မိန့်တော်မူထားပါသည်။
ဤပါဠိတော်၊ အဋ္ဌကထာလာ စကားရပ်တို့ကို ကြည့်သောအားဖြင့်
နေ့စဉ်ပုံမှန် ဘုရားဝတ်တက် ဝတ်ကပ်ပြု နေခြင်းသည် အင်မတန်
အကျိုးကြီးမားကြောင်း သိသာနိုင်ပါသည်၊
၎င်းအပြင် စေတီနှင့်ဘုရားတို့သည် လေးစား စရာလောက်သာ မကဘဲ ရှိခိုးပူဇော်ထိုက် မြတ်နိုးထိုက်၊
အရိုအသေပြုထိုက် ကိုးကွယ်ထိုက်ကြောင်း သိသာပါသည်။
ထိုသို့ပူဇော်ထိုက်၊ လေးစားထိုက်၊ မြတ်နိုးထိုက်သော မြတ်စွာဘုရား၊ ရဟန္တာနှင့်
တပည့်သာဝကတို့အား ပူဇော်ခြင်းကြောင့် ရရှိသည့် ကုသိုလ်ကို တစ်စုံတစ်ယောက်သော ပုဂ္ဂိုလ်ကမျှ
မည်၍ မည်မျှဖြစ်၏၊ ရ၏ဟုမရေတွက် နိုင်သလို ၎င်းကုသိုလ်၏ အကျိုးကိုလည်း မရေတွက်နိုင်ဟု
ဓမ္မပဒအဋ္ဌကထာ၌ မိန့်ဆိုထားပါသည်။
( ဓမ္မပဒ၊ ဒု - ၁၆၃)
အရှင်ဝရသာမိ
https://shinsami.blogspot.com
0 comments:
Post a Comment
ဂုဏ်သိက္ခာရှိရှိ ပညာရှင်ဆန်ဆန် အပြုသဘောဆောင်တဲ့ comment ပေးမယ်လို့
သင့်ကို ယုံကြည်ပါသည်၊