Wednesday, June 23, 2010

အရူးထတာလား သာသနာဖျက်တာလား

စာရေးသူ ယခုဖော်ပြမည့် အကြောင်းအရာတို့ကို အရင်ကရေးချင်စိတ်မရှိခဲ့ပေ။ မိမိက ထိုသို့ရေးလိုက်ပါမှလူလိင် လူညာတယောက်ကို နာမည်ကြီးအောင် ကြော်ငြာပေးလိုက်သလို ဖြစ်မည်ဆိုးသောကြောင့် အကျယ်တဝင့် ရေးဖို့ အားထုတ်မှု့မပြုခဲ့ခြင်းပင် ဖြစ်၏။ သို့သော် ရေးဖို့ရန်အတွက် မဖြစ်မနေအကြောင်းဖန်လာသောကြောင့် ရေးရပေတော့မည်။ မြန်မာနိုင်ငံ၌လည်း ဓမ္မကို ခုတုံးလုပ်၍ လိမ်ညာစားနေသည့် လူလိမ် လူညာများ မယုံကြည်နိုင်လောက်အောင် တနေ့တခြား ပေါများလာကြသည်ကို ဓမ္မမိတ်ဆွေများ အတော်အသင့် သိကြပြီးမည်ဟု ထင်ပါသည်။ ထိုကဲ့သို့သော သူများထဲတွင် ချစ်ငယ်(ဒဿန) ဆိုသူလည်း တဦးအပါဝင်ဖြစ်ပေ၏။ ပထမဦးဆုံးအနေနဲ့ စာဖတ်သူတို့ကို သိစေချင်သည်မှာ http://chitnge.com/ ယခုဖော်ပြပါ ဆိုဒ်လေးကိုဝင်လိုက်သည်နှင့် တွေ့ရသော Dr Chit Nge (Philosophy) Ph.D, London ဆိုသော အလိင်အညာ ဘွဲ့အတုကြီးကို အရင်ဖော်ပြရပေမည်
ထိုဆရာကြီးပြောသည့် Cloverfield University သည် လန်ဒန်ရော အင်္ဂလန်မှာပါ မရှိ။ နာမည်ဆင်တာဟူ၍ Cranfield University သာ ရှိသည်။ ထိုတက္ကသိုလ်ကလည်း စီးပွားရေးနှင့် ကွန်ပျူတာဘာသာရပ်များ အထူးသင်သော ကျောင်းဖြစ်၏ ဟု အင်္ဂလန်မှ ဒကာများ၏ လျှောက်ထားချက်အရ သိရပေ၏။ web-site တခုထူထောင်ကာအလိင်အညာဘွဲ့အတုကြီးနှင့် တခြားသောစာများရေးသားနေမည် ဆိုလျှင်ကား စာရေးသူအနေနဲ့ဝင်ရောက်စွက်ဖက်မိမည် မဟုတ်ချေ။ ခုတော့ ထိုသို့မဟုတ် အလိင်အညာကြီးကို ရှေးတန်းတင်ပြီး လူအထင်ကြီးအောင် လုပ်ကာ ဝိပဿနာဆိုတဲ့ ခေါင်းစဉ်ကြီးကို တွင်တွင်သုံးပြီး ဘုရားရှင်၏မျက်နှာကို အိုးမဲ့သုတ်နေသောကြောင့် သာသနာ့ဝန်ထန်း ရဟန်းတပါးအနေဖြင့် လုပ်သင့်လုပ်ထိုက်သော တာဝန်တို့ကို ထန်းဆောင်ရပေတော့မည်။ အဆိုးဆုံးမှာကား သူကိုယ့်သူ အရိယာဟု ဆိုနေခြင်းပင် နိဗ္ဗာန်မြင်ပြီဆိုတော့ အရိယာပုဂ္ဂိုလ်ဖြစ်ပြီပေါ့ … ဟုတ်တာပေါ့ဗျာ၊ အရိယာပုဂ္ဂိုလ်ဖြစ်ပြီပေါ့။ ကြာပါပြီ ကျွန်တော် အရိယာဖြစ်နေတာ။ ဒါပေမယ့် ဒီရက်ပိုင်းတွေကျမှ စပ်မိလိုဖွင့်ပြောဖြစ်တာပါ။ အကြောင်းအကျိုးတွေကလည်း ပြည့်စုံလာလို့ ပြောဖြစ်တာပါ။ အရိယာပုဂ္ဂိုလ်(၄)ပါးမှာ ဘယ်အဆင့်ရောက်ပြီလဲ ဆိုတာကတော့ အောက်ဆုံးအဆင့်တော့ ဘယ်ဟုတ်ပါ့မလဲဗျာ … ကျွန်တော့်လေကို ဖမ်းကြည့်ရင် သိမှာပေါ့။ ကျွန်တော် အရိယာတို့၊ နိဗ္ဗာန်တို့၊ ရဟန္တာတို့ အကြောင်းတွေကို ပိုင်ပိုင်နိုင်နိုင်ပြောနေတာ ကြာပါပြီ။
သေခါနီးအချိန်အခါ ရောက်မှ အရူးထတာလားဟု မေးလိုက်ချင်စမ်းပါဘိ ထိုအကြောင်းအရာများနှင့် ပတ်သက်ပြီး အွန်လိုင်းပေါ်မှာတင် တင်ထားခြင်းမက စာပေလောကမှာလည်း တရားဝင်စာအုပ်ထုတ်၍ ရေးသားဖြန့်ဝေထားသေး၏။ “နိဗ္ဗာန်-ရဟန္တာ၊ အရိယာ ဝိပဿနာ ဆွေးနွေးချက်များ” ဟူသော စာအုပ်ပင်။ ထိုစာအုပ်၌ပါသော အမှားများကို ဖော်ထုတ်ထားသော ဆောင်းပါးရှင် ဆရာတော်အရှင်ဣန္ဒာစရိယာဘိဝံသ(မစိုးရိမ်စာသင်သား)၏ ဝေဖန်ဖြေရှင်းချက်များ ကို မူရင်းအတိုင်းဖော်ပြပါအံ့။ @@@@@@@@@@@@@@@@@@@@@@@@@@ အကြားအမြင်ရ တရားရှင်၏ ဝိပဿနာ ဆွေးနွေးခန်းများ ၁ နေ့ဆွမ်းဘုန်းပေးပြီး ကျောင်းကြီး တတိယထပ်ရှိ မိမိအခန်းဆီသို့ တက်လာပါသည်။ ဒုတိယထပ် လှေကားအတက်တွင် “လာပါအုံး” ဟု ဆိုသဖြင့် ဒုတိယထပ်ရှိ စာချကိုယ်တော်အခန်းသို့ လိုက်သွားမိပါသည်။ စာချကိုယ်တော်က “ရော့ ဖတ်ကြည့်” ဟု ဆိုကာ စာအုပ်တအုပ် ပေးပါသည်။ စာအုပ်က စိတ်ဝင်စားစရာကောင်းပါသည်။ အရိယာအကြောင်း၊ ဝိပဿနာအကြောင်း၊ ရဟန္တာအကြောင်း၊ နိဗ္ဗာန်အကြောင်းများကို ဆွေးနွေးထားသည့် စာအုပ်ဖြစ်ပါသည်။ ရဟန်းတစ်ပါးအနေဖြင့် စိတ်မဝင်စားဘဲ ဘယ်မှာနေနိုင်အံ့နည်း။ ဗုဒ္ဓဘာသာဝင်တို့ အနေဖြင့်လည်း စိတ်ဝင်စားကြမည်မှာ သေချာပါသည်။ ဤသို့ စိတ်ဝင်စားဖွယ် အတိရှိနေခြင်းကြောင့် စာအုပ်ကလေးကို ယူလာပြီး ဖတ်မိပါသည်။ အမေးအဖြေ စုစုပေါင်း စကားစု ၂၀၀၀ ခန့် ရှိပါသည်။ သို့ရာတွင် ရဟန္တာအကြောင်းလည်း လုံလုံလောက်လောက်မပါ။ အရိယာအကြောင်းလည်း မှတ်ဖွယ်မတွေ့ရ၊ ဝိပဿနာအကြောင်းလည်း စကားလုံးတစ်လုံးမျှသာပါသည်။ စာတွေ့သဘောအရရော၊ လက်တွေ့သဘောအရပါ ခိုင်ခိုင်မာမာ အကြောင်းအရာ တခုမှ မပါပေ။ သို့ပါလျက် စာရေးသူက ပြီးဆုံးသည်အထိ ဆက်ဖတ်နေပါသည်။ စာရေးဆရာ၏ စေတနာကို ခြေရာကောက်ကြည့်၍ စေတနာကောင်းကိုတွေ့လျင် ကြည်ညိုရအောင် ကြိတ်မှိတ်ဖတ်နေခြင်းပင် ပြီးဆုံးသွားပါသည်။ ဘာမျှမပါ။ မျက်နှာဖုံးနှစ်ဘက်တွင် တင်ထားသော စာလုံးကြီးများမှာ စာဖတ်သူ၊ စာအုပ်ဝယ်သူတို့ကို ဆွဲဆောင် ထားခြင်းထက် ဘာမှမပိုကြောင်း သေချာစွာ သိရပါသည်။ အပြီးတိုင်အောင် ဆက်ဖတ်ခြင်းကပင် မှားလေသလော.................၊ ဖတ်ရန်တိုက်တွန်းသော ဦးပဉ္စင်းကပင် မှားလေသလော............၊ တခုခုတော့ မှားနေပြီဟု ဆိုချင်ပါသည်။ နည်းနည်းပါးပါးဖတ်ပြီး “ စေတနာကောင်းနဲ့ ပြုစုထားတာနေမှာပါ” ဟု သဘောထားလိုက်လျှင် ရပါသည်။ အခုတော့ မှားခဲ့မိပေပြီ။ ဤအမှားက စာရေးသူကဲ့သို့ မှားနေကြမည်ကို သတိပြုမိစေလိုသော ဆန္ဒ၊ သို့မဟုတ် အမှားကို အမှန်ထင်အံ့သောကြောင့် စိစစ်တင်ပြလိုသော ဆန္ဒတို့ကို အားကြီးလာစေပါသည်။ ဤဆန္ဒဖြင့်ပင် အမေးနှင့် အဖြေများထဲက တချို့ကို အမှား အမှန် စိစစ်ကြည့်မိပါသည်။ အဖြေက အကြားအမြင်ရဆိုသူ ဆရာ၏စကားဖြစ်ပါသည်။ အမေးကမူ ထိုဆရာ၏တပည့် စာရေးဆရာ၏ စကားဖြစ်ပါသည်။ အဖြေကို (က) ၊ အမေးကို (ခ) ဟု သင်္ကေတတပ်၍ ကူးယူဖော်ပြလိုက်ပါသည်။ ၂ (က) ။ ။ ကျွန်တော့်ကိုလဲ အထင်မကြီးကြဘူး။ ကျွန်တော် အကြားအမြင် ရတယ်ဆိုတာကိုလဲ မယုံချင်ကြဘူး။ (ခ) ။ ။ ဟာ - ခင်ဗျားကလဲ ပေါ်တင်ကြီးပါလား။ (က)။ ။ ပေါ်တင်ကြီးပဲလေ။ ကျွန်တော်က လူရိုးလူဖြောင့် စိတ်တို ဆိုတာ ခင်းဗျားလဲသိသားနဲ့။ (ခ)။ ။ ဒါက ဒီလိုရှိပါတယ်။ ခင်ဗျား အကြားအမြင်ရတာကို ဘယ်သူကမှ ထပ်ပြီး အကြားအမြင် မရလို့ဗျ။ (က)။ ။ သူတို့ မမြင်မကြားတိုင်း ကျွန်တော်က မမြင်မကြားဖြစ်ရတော့မှာလား။ ဒီလိုဆို အမှန်တရားရှိတာ တိမ်ငုတ်ပျောက်ကွယ်သွားတော့မှာပေါ့။ (“နိဗ္ဗာန်-ရဟန္တာ၊ အရိယာ ဝိပဿနာ ဆွေးနွေးချက်များ” ဟူသော စာအုပ် ၁၃) (က)။ ။ ဝိပဿနာသမားဆိုတာ ဖြစ်ပျက်ဆုံးအောင် ရှူ့ရတယ်။ ဖြစ်ပျက်ဆုံးတယ်ဆိုတာ စိတ်ချုပ်တာပဲ။ (ခ)။ ။ စိတ်ချုပ်တော့ ဘာကျန်လဲ။ (က)။ ။ ဉာဏ်ကျန်တယ်။ (ခ)။ ။ ဉာဏ်ဆိုတာ ဘာလဲ။ (က)။ ။ဉာဆိုတာ စစ်မှန်စင်ကြယ်တဲ့ အသိနဲ့ယှဉ်တယ်။ (ခ)။ ။ ခင်ဗျားမှာ ဉာဏ်ရှိလား။ (က)။ ။ ဉာဏ်ရှိလို့ ဒါတွေပြောနေတာပေါ့။ (၎င်းစာအုပ် - ၁၉) (က)။ ။ အဲဒါပြောတာပေါ့ဗျ၊ နိဗ္ဗာန်ဟာ စေတသိတ်ဆိုရင် ပရမတ္ထတရားလေးပါးလို့ မလာနဲ့တော့။ သုံးပါးလို့သာ လာတော့။ ဒီတော့ နိဗ္ဗာန်လို့ သီးခြား မဖော်ပြနဲ့တော့။ (ခ)။ ။ အေးဗျာ၊ ခင်ဗျား ဒီလိုပွင်ပွင့်လင်းလင်းတင်ပြလိုက်တော့ သူတို့ဖတ်မိရင်လည်း ပြုပြင်ချင် ပြုပြင်သွားကြမှာပါ။ (က)ပြုပြင်ရင်တော့ သာဓုခေါ်စရာပေါ့ဗျာ။ မပြုပြင်ဘဲ ဒေါသူပုန်ထချင် ထကြမှာ။ ဒီလို ဒေါသူပုန်ထပြီး သူတို့အယူအဆကို မှန်ပါတယ်လို့ ပွင့်အန်လာရင်တော့ အဲဒီအဖွဲ့ နာပြီပေါ့ဗျာ။ (၎င်းစာအုပ် - ၂၂-၂၃) (ခ)။ ။ကမ္ဘာက ရုပ်ကြမ်းအဆင့်သာသာပဲ ရှိနေတာဗျာ။ သိပ်သိမ်မွေ့တဲ့ အသိပညာတွေကို ဘယ်လိုက်နိုင်မှာလဲ။ (က)။ ။ အဲဒါကြောင့် ကျွန်တော်တို့မှာ အခက်အခဲဖြစ်နေတာပေါ့ဗျာ။ သိသာထင်ရှားတဲ့ အရာတွေသာ ပေါ်ပြူလာဖြစ်နေတာ။ လေးနက်နက်ရှိုင်း သိမ်မွေ့မှု့တွေက မြုတ်ကွယ်နေတာ။ ကျွန်တော်တို့ ခင်ဗျားတို့လို တစ်ဖက်ကမ်ခတ်သမားတွေကြောင့်သာ (မြန်မာတွေ အောင်မြင်ပြောင်မြောက်ပုံများ) မတိမ်ကော၊ မကွယ်ပတာ။ (၎င်းစာအုပ် - ၃၇) (ခ)။ ။ ဒီသတင်းစကား အမှန်အကန်ကို “ခင်ဗျားပြောပြတဲ့ အကြားအမြင် သတင်းစကားကို” ကျွန်တော် စာဖတ်ပရိတ်သတ်ကြီးထံ အမြန်ပို့လိုက်တော့မယ်ဗျာ။ ကျွန်တော် ဘဝင်ကျသွားပြီ။ (၎င်းစာအုပ် - ၄၂) ၃ ၎င်းစာအုပ် ၁၃- ပါ အမေးအဖြေများနှင့် ဆရာဖြစ်သူ(ချစ်ငယ်)၏ အကြားအမြင်ရခြင်းကို ဖော်ပြထားပါသည်။ ယင်းအကြားအမြင်မှာ ဗုဒ္ဓ၏ ဓမ္မနည်းဖြင့် ရရှိထားခြင်း မဟုတ်ကြောင်းကိုပါ တစ်သားတည်း ဖော်ပြပြီးဖြစ်ကြောင်း သိရပါသည်။ အကြားအမြင်ဆိုသည်မှာ ဗုဒ္ဓ၏ ဓမ္မအရမှာမူ ဈာန်အဘိဉာဉ် ဖြစ်ပါသည်။ ဈာန်အဘိဉာဉ်သည် သမထဘာဝနာကြောင့် ဖြစ်ပေါ်လာရသော တရားသာတည်း။ ဆရာဖြစ်သူက ဝိပဿနာရှူကြောင်း အကြိမ်ကြိမ်ဖော်ပြထားသဖြင့် အကြောင်းအကျိုးမတည့်ပါ။ ဖော်ပြရာ၌လည်း ဝေါဟာရများသာ ပါရှိသည်။ ၎င်းစာအုပ် ၁၉ ပါ စကားစုဖြင့် အမှားများကို ဖော်ပြထားပါသည်။ စိတ်ချုပ်တော့ ဉာဏ်ကျန်၏ ဟု ဆိုခြင်း၊ ဉာဏ်မှာ စစ်မှန် စင်ကြယ်သော အသိနှင့် ယှဉ်၏ဟု ဆိုခြင်း တို့မှာ အဘိဓမ္မာ ဒေသနာတော်များနှင့် ဆန့်ကျင်လှပါသည်။ သဂြိုၤလ်ကျမ်းလာ စေတသိတ်ပိုင်းကို သင်ဖူးသူတိုင်း သိနိုင်သောအရာပင်။ ၎င်းစာအုပ် ၂၂-၂၃- ၂၇ ပါ စကားစုဖြင့် ဒေါသူပုန်ထခြင်း၊ မိမိကိုယ်ကို တစ်ဖက်ကမ်းခတ်ဟု ဆို၍ ဝိပဿနာပေါက်မြောက်မှု့ စသည်များ မကွယ်ပခြင်းမှာ မိမိတို့လို ဆရာတပည့် ပုဂ္ဂိုလ်များကြောင့် ဟု နေရာလုခြင်းများကို ဖော်ပြထားပါသည်။ ပရိယတ္တိ၊ ပဋိပတ္တိဝန်ထန်း ရဟန်းတော်တို့ကို စော်ကားထားခြင်းပင်။ စာရေးသူအနေဖြင့် ဤမျှသာ တင်ပြလိုပါသည်။ စာရေးသူ မှားမိ၍ တစ်နေကုန်ထိ အချိန်ကုန်လိုက်ရပါသည်။ စာရေးသူကဲ့သို့ မမှားမိကြစေရန် (နာမှာကြောက်ကြောက်ဖြင့်) အရဲစွန့်လိုက်ရခြင်းပင်။ ဝိပဿနာ တရားရှင် သူတော်စင်ဆရာဆိုသူ ဆရာက နာချင်ပြီလားဟု ကြိမ်းဝါးထားရာ ကြောက်မိပါ၏။ အဆိုပါကြမ်းစာကား အရိယာ၊ ရဟန္တာ၊ နိဗ္ဗာန်၊ ဝိပဿနာ စသည်များဖြင့် အဖုံးကိုပြုလုပ်ထားသောလည်း မထမထပ် အခြေခံအုပ်မြစ်မပါပဲ ဆောက်ထားခြင်းနှင့် တူလှပါသည်။ အဖုံးနှင့်အတွင်းသား တခြားစီ ပြုလုပ်ထားသော ရောင်းပန်းလှ စာအုပ်မျှသာ ဖြစ်ပါသည်။ ၂၀၀ရ-ခုနှစ်၊ သြဂုတ်လ၊ ဓမ္မရံသီမဂ္ဂဇင်း @@@@@@@@@@@@@@@@@@@@@@@@@@@@@@@@@@@ ယခုတော့ ဤမျှသာပဲ ဖော်ပြလိုက်ရပါသည်။ သာသနာဖျက် မိစ္ဆာဒိဌိ ချစ်ငယ်(ဒဿန) ၏ အလိင်အညာများကို ဆက်လက်၍ ဖော်ထုတ်သွားပါအုံးမည်...................................

0 comments:

Post a Comment

ဂုဏ်သိက္ခာရှိရှိ ပညာရှင်ဆန်ဆန် အပြုသဘောဆောင်တဲ့ comment ပေးမယ်လို့
သင့်ကို ယုံကြည်ပါသည်၊