လူတို့သည် ပုဂ္ဂိုလ်တဦးကို ကြည်ညိုရာ၌ပင် တူညီမှု့မရှိတတ်ကြပေ။
ကိုယ်သန်ရာသန်ရာကို ရွေးချယ်တတ်ကြ၏။ ထိုသို့သော ယုံကြည်ကိုးကွယ်မှု့ကို
အဌကထာဆရာက ဤသို့ဖွင့်ပြပါသည်။
၎င်းတို့မှာ..........
(၁) ရူပပ္ပမာဏ - ရုပ်ဆင်းအင်္ဂါ လှပခြင်းကို အစွဲပြု၍ ကြည်ညိုသူ။
(၂) ဃောသပ္ပမာဏ - ကျော်စောသံကို ကြား၍ကြည်ညိုသူ။
(၃) လူခပ္ပမာဏ - ခေါင်းပါးသောအကျင့်ကို စွဲ၍ ကြည်ညိုသူ ။
(၄) ဓမ္မပမာဏ - သီလ၊ သမာဓိ၊ ပညာရှိမှု့ကို စွဲ၍ ကြည်ညိုသူ ဟူ၍ ဖြစ်ပါသည်။
(မဇ္ဈိမမဏ္ဏာသ၊ ဌ၊ ၁။ ၃၀၇)
ထို (၄) ယောက်တို့တွင်........
(၁) ရူပပ္ပမာဏ ရုပ်အဆင်းလှမှု့ကို ကြည်ညိုသူသည် ပစ္စုပ္ပန်သံသရာ၌ မည်သည့်ကောင်းကျိုးမျှ
ရရှိမည်မဟုတ်ပေ။ မြတ်စွာဘုရားက ဝက္ကလိရဟန်းကို ကဲ့ရဲ့သကဲ့သို့ ဘုရားရှင်ကဲ့ရဲ့ခံရမည်သာ
ဖြစ်ချေသည်။ အောက်ထစ်ဆုံးအားဖြင့် ကြည်ညိုသူက အမျိုးသမီးယောဂီဖြစ်လျှင်မူ
“လူပျံတော်မယား” ဟူသော ဘွဲ့ထူးဂုဏ်ထူးရခြင်းမှ တပါး အခြားသောအကျိုးမရှိပေ။
(၂) ဃောသပ္ပမာဏ - အရ ကျော်စောသံကို ကြား၍ကြည်ညိုလျှင်လည်း အလိမ်ခံရတတ်ပေသည်။
အကြောင်းမှာ -
ဟုတ်၍ ကျော်သောပုဂ္ဂိုလ်များရှိသကဲ့သို့ မဟုတ်ဘဲနှင့် ကျော်နေသည့် ပုဂ္ဂိုလ်များလည်း
ရှိတတ်သောကြောင့် ဖြစ်ပါသည်။
မှန်ပေသည် -
နာမည်ကြီးခြင်း၊ ကျော်စောခြင်းသည် အစစ်အမှန် များရှိသကဲ့သို့ အလံရူးအဖွဲ့က ကြော်ငြာပေးခြင်း၊
ဝိုင်းပင့်ပေးသောနည်းဖြင့် အသိုင်းအဝိုင်း အင်အားကိုသုံးပြီး နာမည်ကြီးအောင်
လှော်ပေးခြင်းတို့ကြောင့် နာမည်ကြီးသူများလည်း ရှိတတ်ကြပေသည်။
(ယခုခေတ်အခါတွင် ပေါ်ပေါက်နေကြသော စူနာမီ၊ ချစ်ငယ် .....စသော အဓမ္မဝါဒ
လူလိင်လူညာများကဲ့သို့သော အဖွဲ့များကို ဆိုလိုပါသည်)
ဥပမာ - ကြော်ငြာထည့်၍ ကြော်ငြာတိုင်း ပစ္စည်းမှန်၊ ပစ္စည်းကောင်းဟု
မသတ်မှတ်နိုင်သကဲ့သို့ ဖြစ်ပါသည်။
(၃) လူခပ္ပမာဏ -အရ သင်္ကန်း သပိတ်ခေါင်းပါးမှု့ကို ကြည့်၍ ကြည်ညိုလျှင်လည်း
အလိမ်ခံရတတ်ပေသည်။ အကြောင်းမှာ ..........
ခေါင်းပါးမှ လူကြည်ညိုမည်၊ လူကြည်ညိုမှ လာဘ်လာဘပေါများပြီး ထင်ပေါ်ကြော်ကြားမည်
ဟူသော အကြံအစည်ဖြင့် ခေါင်းပါးပြသူများလည်း ရှိတတ်သောကြောင့်ပင် ဖြစ်ပါသည်။
မှန်ပေသည် -
လောက၌ ခေါင်းပါသူ အစစ်အမှန်များရှိသကဲ့သို့ ခေါင်းပါးသယောင် ဟန်ဆောင်နေသူများလည်း
ရှိတတ်ပေသည်။ ဤကဲ့သို့သော အတုယောင်များလည်း ရှိတတ်ကြောင်းကို မြတ်စွာဘုရားက
ဤသို့ဟောတော်မူခဲ့ပါသည်..........
“ရဟန်းတို့ ပညာနုံသောကြောင့်၊ တွေဝေသောကြောင့် တော၌နေသည့် တောနေရဟန်းများလည်း
ရှိတတ်ကြ၏။ ယုတ်ညံ့သော အလိုရှိသည်ဖြစ်၍၊ အလိုဆိုးနှိပ်စက်အပ်သည်ဖြစ်၍ တော၌နေသည့်
တောနေရဟန်းများလည်း ရှိတတ်၏။ ရူးသွပ်ခြင်း၊ စိတ်ပျံ့လွင့်ခြင်းကြောင့် တော၌နေသည့်
တောနေရဟန်းများလည်း ရှိတတ်၏။ ဗုဒ္ဓ နှင့် ဗုဒ္ဓသာဝကတို့သည် ချီမွမ်းအပ်၏ဟု နှလုံးသွင်း၍
တော၌နေသည့် တောနေရဟန်းများလည်း ရှိတတ်ကြ၏။
အလိုနည်းမှု့၊ ရောင့်ရဲမှု့၊ ခေါင်းပါးမှု့၊ ဆိတ်ငြိမ်မှု့ ကိုသာလျင်မှီ၍ အကျင့်ဖြင့် အကျိုးရှိမှု့ကိုသာလျင်မှီ၍
တော၌နေသည့် တောနေရဟန်းများလည်း ရှိတတ်ကြ၏။
(အာရညိကသုတ်) (အံ၊ ၂၊ ၁၉၃)
ထိုတောနေရဟန်း ငါးမျိုးတို့တွင် ယုတ်ညံ့သော အလိုရှိသည့် တောနေရဟန်းဟူသည်..
“တောထဲမှာနေသော ငါ့အား ဒီဆရာတော်က တောထဲမှာ တပါးတည်းနေရှာတယ် ဟု
လူအပေါင်းက ပစ္စည်းလေးပါးဖြင့် ပူဇော်ကြလိမ့်မယ်။
ဒီဆရာတော်က ဆိတ်ငြိမ်ရာအရပ်မှာသာ ပျော်တတ်တယ် စသည်ဖြင့် လူအပေါင်းက
ချီမွမ်းကြလိမ့်မယ်” စသည်ဖြင့် ထင်ပေါ်ကျော်ကြား လာဘ်ပေါများလို၍ အာရညိကဓုတင်
ဆောက်တည်သော ရဟန်းမျိုးကို ဆိုပေသည်။
(အံ၊ ဌ။ ၃၊ ၆၅)
(၄) ဓမ္မပမာဏ - အရ သီလ၊ သမာဓိ၊ ပညာတည်းဟူသော သိက္ခာသုံးရပ် အကျင့်မြတ်ကို
ချင့်ချိန်ဝေဖန်၍ ကြည်ညိုခြင်းသည်သာ အန္တရယ်အကင်းဆုံး၊ ဘေးအရှင်းဆုံး ကိုးကွယ်ခြင်းမျိုး
ဖြစ်ပေသည်။ ပစ္စုပ္ပန်သံသရာ၌ ကောင်းကျိုးချမ်းသာ ခံစားရန်အတွက် စိတ်အချရဆုံးသော
ကိုးကွယ်ခြင်းမျိုး ဖြစ်ပါသည်။
သို့ဖြစ်၍ စာဖတ်သူအပေါင်း သူတော်ကောင်းတို့သည်
ရုပ်လှသူနောက် ကောက်ကောက်ပါအောင် လိုက်နေကြသူများ၊
နာမည်ကြီး၍ ဆည်းကပ်နေကြသူများ၊
ခေါင်းပါးခြင်းဖြင့် အလိမ်ခံရသူများ မဖြစ်ရလေအောင် သိက္ခာသုံးရပ် အကျင့်မြတ်ကို
ရွေးချယ်ဆည်းကပ်နိုင်စေရန် အသိပေးအပ်ပါသည်။
ဘဒ္ဒန ္တဝိစိတ္တာဘိဝံသ
(ဝီရသူ - မစိုးရိမ်)
အရှင်ဝရသာမိ
တပည့္ေတာ္ ရိုေသစြာ နာယူမွတ္သားသြားပါသည္ ဘုရား။
ReplyDelete