မဇ္ဈိမဒေသမှ လေ့လာစရာ နေရာဒေသများ - ၁၃ (ကောသမ္ဗီ ပြည်)

မြတ်စွာဘုရားရှင် ၉ ဝါမြောက်ဝါဆိုတော်မူခဲ့သော ကောသမ္ဗီသည် တိုင်းကြီး ၁၆ တိုင်းတွင်

ဝံသတိုင်း၌ ပါဝင်သည်။ မြတ်စွာဘုရားလက်ထက်တော်၌ ကောသမ္ဗီသည် မြို့တော်ကြီး

(၆) မြို့တွင် တခုအပါအဝင်ဖြစ်သည်။ ကောသမ္ဗီမြို့သည် ကောသလတိုင်း နှင့် မဂဓတိုင်း

တို့မှ ဝင်ရောက်လာသည့် လူနှင့်ကုန်ပစ္စည်းများ သိုလှောင်ရာဌာနကြီးဖြစ်သည်။ မဇ္ဈိမဒေသ

အဝင်အထွက် ကုန်သွယ်ရေးလမ်းပေါ်၌ တည်ရှိသည့် အခြေအနေကြောင့် ကောသမ္ဗီသည်

ကြွယ်ဝချမ်းသာသောမြို့ ဖြစ်ခဲ့သည်။ တစ်ချိန်က အလွန်ကြီးကျယ်ခန်းနားခဲ့သော မြို့ကြီး

ဖြစ်သော်လည်း ယခုအချိန်တွင်တော့ ရွာငယ်လေး တစ်ခုအဖြစ်သာ တွေ့မြင်နိုင်ပါတော့သည်။

ကောသမ္ဗီတွင် ရှိခဲ့ဘူးသော စေတီနှင့် ကျောင်းဆောင်တို့သည် အမှတ်အသားအဖြစ်

သိနိုင်ရုံသာ ကြွင်းကျန်ခဲ့သည်။ ကောသမ္ဗီမြို့သည် မွတ်စလင် မူဂိုလ်(Mughal)ဘုရင်များ

ဝင်ရောက်လာပြီးနောက် ရှာ၍မရနိုင်လောက်အောင် (သုညမြို့တော်အဖြစ်) ဖျက်ဆီးခံခဲ့

ရသည်ဟု ဆိုသည်။

ဤကောသမ္ဗီသည်လည်း ဘုရားဖူးခရီးသွားများ ရောက်နိုင်ခဲသော နေရာတစ်ခုဖြစ်သော

ကြောင့် အများစုသော ဘုရားဖူးခရီသွားများ ရောက်ဖူးသူမရှိသလောက် နည်းပါးပါသည်။

ဗုဒ္ဓဘာသာ၏ သမိုင်းဝင်ဌာနများထဲမှ ဤကောသမ္ဗီသည်လည်း သွားရောက်လေ့လာသင့်

သောနေရာတစ်ခု ဖြစ်ပေသည်။

ဤဒေသသို့ 24.9.2012 ရက်နေ့အချိန်က သူငယ်ချင်းများနှင့်အတူ စာရေးသူ သွားရောက်

လေ့လာဖြစ်ခဲ့ပါသည်။ ဗာရာဏသီမြို့မှ မနက် ၅ နာရီထိုးတွင် ကားဖြင့်စတင်ထွက်ဖြစ်ခဲ့

ကြပြီး ၁၂ နာရီခန့်တွင် ကောသမ္ဗီသို့ ရောက်ရှိခဲ့ပါသည်။ ရှေးအခါက ကောသမ္ဗီကို ယနေ့

အခေါ်အားဖြင့် ကောဆမ်(Kosam)ဟု ခေါ်ကြသည်။ ယနေ့အချိန်ခါတွင် ဥတ္တရာပရာ

ဒေ့ရှ်ပြည်နယ်၊ အာလာဘတ်(Allahabad)မြို့နယ်အတွင်း၌ တည်ရှိသည်။ ဗာရာဏသီမြို့မှ

(Allahabad) အာလာဘတ်မြို့ထိ (၁၂၂) ကီလိုမီတာရှိ၍၊ အာလာဘတ်မြို့မှ ကောသမ္ဗီမြို့

ဟောင်းထိ (၅၁) ကီလိုမီတာ ကွာဝေးပါသည်။

ကောသမ္ဗီမြို့မှ သာ့သနာ ဂုဏ်ဆောင် ၃ ဦး

ဗုဒ္ဓဘုရားရှင်လက်ထက်က သာဝက, သာဝိကာ၊ ဥပါသကာအမျိုးသား၊ ဥပါသကာ

အမျိုးသမီးတို့အနက် ပညာအရာ၌ ထူးချွန်သူ၊ တန်းခိုးအရာ၌ ထူးချွန်သူ၊ တရားဟော

သည့်အရာ၌ ထူးချွန်သူ၊ ပိဋကတ်သုံးပုံဆောင်သည့်အရာ၌ ထူးချွန်သူ စသည်ဖြင့်

ထူးချွန်သူတို့အား ဧတဒဂ်ဂုဏ်ထူး(ရာထူး)များ အပ်နှင်းတော်မူခဲ့သည်။

ရဟန်းတော်များထဲမှ ဧတဒဂ်ရာထူးရရှိသော ရဟန္တာပေါင်း (၄၁) ပါးရှိခဲ့၍ ရဟန်းမ

များထဲမှ ဧတဒဂ်ရာထူးရရှိသော ရဟန္တာမပေါင်း (၁၃) ဦး ရှိခဲ့သည်။ ဥပါသကာ

အမျိုးသားများထဲမှ ဧတဒဂ်ရာထူးရရှိသော ဥပါသကာပေါင်း ၁၀ ဦးရှိခဲ့၍ ဥပါသိကာ

အမျိုးသမီးပေါင်းမှာလည်း ၁၀ ဦးရှိခဲ့သည်။

ဧတဒဂ်ရာထူးရ ရဟန္တာ(၄၁) ပါးနှင့် ဥပါသိကာအမျိုးသမီး (၁၀) ဦးအနက် ကောသမ္ဗီမြို့

မှ (၃) ဦးပါဝင်ခဲ့သည်။ တစ်ဦးမှာ ကောသမ္ဗီသူဌေးကြီး၏သား အရှင်ဗာကုလရဟန္တာ

ဖြစ်၍ အနာရောဂါကင်းရှင်းသည့်အရာဝယ် အသာဆုံး အမြတ်ဆုံး ဧတဒဂ်ရာထူး

အပ်နှင်းခြင်း ခံရသည်။ သက်တော် (၁၆၀) ရှည်တော်မူသည်။ နောက်တစ်ဦးမှာ

ဥတေနမင်း၏ မိဖုရားတစ်ဦးဖြစ်သော သာမာဝတီမိဖုရားဖြစ်သည်။ နောက်တစ်ဦးမှာ

သာမာဝတီမိဖုရား၏ အလုပ်အကျွေး အမျိုးသမီးတို့၏ ဂုဏ်ဆောင်ဖြစ်သော တိပိဋကဓရ

(ပိဋကတ်သုံးပုံဆောင်) ခုဇ္ဇုတ္တရာ အမျိုးသမီးဖြစ်သည်။

ဤကောသမ္ဗီပြည်သည် ပရန ္တပမင်း၊ ဥတေနမင်းတို့၏ ဖွားရာ ဇာတိဖြစ်သလို

သာသနာ့သမိုင်းတွင် ပထမဆုံး သံဃာ့ဂိုဏ်းကွဲမှုကြီး စတင်ပေါ်ပေါက်ခဲ့ရာ

နေရာလည်းဖြစ်သည်။

ဥတေနမင်း၏ နန်းတော်ရာ

ယနေ့ အချိန်အခါတွင် ကောသမ္ဗီမြို့ရိုးနေရာနှင်အတူ ဥတေနမင်း၏ နန်းတော်ရာဟောင်း

နေရာကိုလည်း တွေ့မြင်နိုင်ပါသည်။

တစ်ချိန်က ဤနန်းတော်ရာသည် တော်တော်ကျယ်ဝန်းမည့် နေရာဖြစ်နိုင်ဖွယ်ရှိသည်။

ယခုအခါမှာတော့ မြစ်ကမ်းဘေးတွင် ရှိသော ဘေးတဖက်မှတံတိုင်းနံရံတို့မှာ ယမုံနာမြစ်၏

ရေတိုက်စားမှုကြောင့် ပျက်စီးယိုယွင်းနေသည်ကို တွေ့ရှိရ၏။ အခြားသောဖက်မှ နန်းမြို့ရိုး

နေရာများကို မြေအောက်မှ ပြန်လည်တူးဖော်ဆဲ ရှိသေးတာကို တွေ့ခဲ့ရသည်။ အလယ်ပိုင်း

နေရာများတွင်တော့ လယ်ယာများ ဖြစ်၍နေသည်ကို တွေ့မြင်နိုင်ပါသည်။

ကောသမ္ဗီပြည်ကို အုပ်ချုပ်သော ပရန ္တပမင်း နတ်ရွာစံသောပြီးသောအခါ သားဖြစ်သူ ဥတေန

မင်းက ကောသမ္ဗီကို ဆက်လက် အုပ်ချုပ်ခဲ့သည်။ ဥတေနမင်းတွင် သာမာဝတီ၊ မာဂဏ္ဍီ နှင့်

ဝါသုလဒတ္တာဟူသော မိဖုရား ၃ ယောက်ရှိသည်။သာမာဝတီသည် မဂဓတိုင်း၊ ဘဒ္ဒိယမြို့၊ ဘဒ္ဒ

ဝတီသူဌေးကြီး၏ သမီးဖြစ်၍ ကောသမ္ဗီပြည် ဃောသကသူဌေးကြီး၏ မွေးစားသမီးလည်း

ဖြစ်သည်။ မာဂဏ္ဍီမိဖုရားသည် မာဂဏ္ဍိယ ပုဏ္ဏားကြီး၏ သမီးဖြစ်သည်။ ဝါသုလဒတ္တာ

သည် ဥဇ္ဇေနီပြည် စန္ဒပဇ္ဇောတာမင်းနှင့် မိဖုရားခေါင်ကြီးတို့၏ သမီးဖြစ်သည်။

သာမာဝတီ မိဖုရား

ဘဒ္ဒဝတီသူဌေးကြီးနှင့် ကောသမ္ဗီမြို့ ဃောသကသူဌေးကြီးတို့သည် တစ်ဦးနှင့်တစ်ဦး

မမြင်ဘူးကြသော်လည်း သူငယ်ချင်းမိတ်ဆွေများဖြစ်နေကြသည်။ တစ်ချိန်သောအခါ

ဘဒ္ဒိယမြို့၌ မြွေဆိပ်နှင့်တူသောလေနာရောဂါကပ်ဆိုးကြီး ကျရောက်သောကြောင့်

သားအမိ၊ သားအဖ သုံးဦးလုံး ကောသမ္ဗီမြို့သို့ ထွက်ပြေးတိမ်းရှောင်ခဲ့ကြသည်။

ကောသမ္ဗီမြို့သော ရောက်သောအခါ ဘဒ္ဒဝတီသူဌေးကြီးသည် ခရီးပန်းလာသဖြင့်

ဃောသကသူဌေးနှင့် ချက်ချင်းမတွေ့နိုင်သေးပဲ နှစ်ရက်သုံးရက်နေပြီးမှ တွေ့မည်ဟု

ပြောဆိုကာ အများသူငှါ တည်းခိုသည့်ဇရပ်၌ တည်းခိုခဲ့ကြသည်။

ဃောသကသူဌေးကြီးက လူဆင်းရဲတို့အား နေ့စဉ်စွန့်ကြဲနေသော ထမင်းထုပ်များကို

သမီးလေးသာမာဝတီအား တောင်းခိုင်း၍ စားသောက်သုံးဆောင်ခဲ့ရာ ခရီးပမ်းသည့်

ဒဏ်၊ အစာကြမ်းကို အများကြီးစားမိ၍ အစာမကြေသည့်ရောဂါဒဏ်တို့ကြောင့် သူဌေး

ကြီးခမျာ ကွယ်လွန်ခဲ့ရရှာသည်။ မိခင်သူဌေးကတော်ကြီးသည် သောက ပရိဒေဝ

ဆင့်ကာ ထိုနည်းအတူပင် ကွယ်လွန်လေသည်။ ဃောသကသဌေးကြီး၏ အလှူတို့၌

စီမံအားထုတ်နေသော မိတ္တသူကြွယ်က သူဌေးသမီး သာမာဝတီကို မှတ်မိ၍ မေးမြန်း

စုံစမ်းရာ ဘဒ္ဒဝတီသူဌေးကြီး၏ သမီးဖြစ်ကြောင်း သိရှိပြီးနောက် သူ၏သမီးကြီးအဖြစ်

မွေးစားခဲ့သည်။ နောက်ပိုင်းတွင် သာမာဝတီ၏ဖြစ်စဉ်ကို ဃောသကသူဌေးကြီး သိ

သွားပြီး ငါ့မိတ်ဆွေသူငယ်ချင်းရဲ့သမီးဟာ ငါ့သမီးပါပဲဟု ပြောဆိုကာ အခြွေအရံ

အမျိုးသမီး (၅၀၀) ကိုပေး၍ သမီးကြီးအဖြစ် မွေးစားခဲ့သည်။

သာမာဝတီ နှင့် အခြွေအရံအမျိုးသမီး (၅၀၀) တို့သည် နန်းတော်ရင်ပြင်ရှေ့မှ ဖြတ်

သန်းကာ ယမုနာမြစ်သို့သွားရောက်၍ ရေချိုးကြသောအခါ ဥတေနမင်းက မြင်လျှင်

မြင်ချင်း ချစ်မိသွားကာ သူဌေးကြီးထံမှ တောင်းယူ၍ သာမာဝတီကို မိဖုရားကြီးအဖြစ်

မြှောက်စားခဲ့သည်။

ခုဇ္ဇုတ္တရာ အမျိုးသမီး

ခုဇ္ဇုတ္တရာ၏ နာမည်အရင်းမှာ ဥတ္တရာဖြစ်ပြီး ခါးကုန်းသောကြောင့် ခုဇ္ဇုတ္တရာ ဟုခေါ်ဆို

ကြခြင်းဖြစ်သည်။ (ခုဇ္ဇ - ကုန်းသောကိုယ်ရှိသော၊ ဥတ္တရာ - ဥတ္တရာမည်သောသူငယ်မ)

ခုဇ္ဇုတ္တရာသည် သာမာဝတီမိဖုရား၏ အခိုင်းအစေ ကျွန်မတစ်ဦးဖြစ်သည်။ ဥတေန

မင်းကြီးက သာမာဝတီမိဖုရားအတွက် နေ့စဉ်အသပြာရှစ်ကျပ်ဖိုး ဆက်သရန် ခုဇ္ဇုတ္တရာ

အား တားဝန်ပေးခဲ့ထားခဲ့သည်။ ခုဇ္ဇုတ္တရာသည် သုမနသူဌေးကြီးကထံမှ ပန်းများကို

နေ့စဉ်ဝယ်ယူပြီး ဆက်သခဲ့ရာ လေးကျပ်ဖိုးသာ ဝယ်ယူပြီး ကျန်လေးကျပ်ကို ခိုးဝှက်

ယူထားလေ့ရှိခဲ့သည်။ တစ်နေ့သောအခါ ပန်းသွားဝယ်စဉ် သုမနသူဌေးကြီး၏ ဆွမ်း

အလှူပွဲတွင် ဟောကြားသော မြတ်စွာဘုရား၏ တရားတော်ကို နာယူရာ တရားနာ

ကြားပြီးသည်၏အဆုံး၌ သောတာပန် အရိယာဖြစ်ခဲ့သည်။

သောတာပန် အရိယာဖြစ်သွားသောအခါ ခိုးဝှက်ယူလိုစိတ်မရှိတော့ဘဲ အသပြာရှစ်ကျပ်

ဖိုးလုံး ပန်းများကိုဝယ်ယူကာ သာမာဝတီမိဖုရားအား ဆက်သရာ သာမာဝတီမိဖုရားက

"ယနေ့ မင်းကြီးက ငါတို့အပေါ် ကြည်ဖြူနေလို့လား သို့မဟုတ် ပန်းဖိုးနှစ်ဆတိုးပေး၍

ပန်းတွေများနေတာလား" ဟု မေးမြန်းရာ မဟုတ်ကြောင်းရှင်းပြ၍ အရင်က သူခိုးဝှက်

ယူထားခဲ့သည်များကို ပြန်လည်ရှင်းပြဝန်ခံခဲ့သည်။ ဒီနေ့ဘာကြောင့်မခိုးတာလည်းဟု

မေးမြန်းရာ ယနေ့ မြတ်စွာဘုရား၏ တရားတော်ကို နာကြားခွင့်ရပြီး နိဗ္ဗာန်ရောက်

ကြောင်းတရားကို သိခဲ့ပြီးဖြစ်သောကြောင့် ခိုးယူခြင်းမရှိတော့ပါဟု ပြန်လည်ဖြေကြား

လေသည်။ ထိုအခါ သာမာဝတီ မိဖုရားမှ မြတ်စွာဘုရားဟောကြားသော တရားတော်

ကို သူတို့ကိုလည်း ပြန်လည်ဟောကြားပေးပါဟု တောင်းဆိုသောကြောင့် ခုဇ္ဇုတ္တရာမှ

မြတ်စွာဘုရားဟောကြားသည့်အတိုင်း ပြန်လည်ဟောကြားရာ သာမာဝတီမိဖုရားနှင့်

တကွ အခြွေအရံအမျိုးသမီး (၅၀၀) တို့သည် တရားတော်၏ အဆုံး၌ သောတာပန်

အရိယာများ ဖြစ်သွားခဲ့သည်။

အမျိုးသမီးများအတွက် ဂုဏ်ယူစရာ ကျမ်းစာ

နောက်ပိုင်းတွင်လည်း မြတ်စွာဘုရားဟောကြားတော်မူသော တရားတော်များကို

သာမာဝတီဦးဆောင်သော အခြွေငါးရာတို့အား ပြန်လည် ဟောကြားရင်း ပိဋကတ်

သုံးပုံဆောင်နိုင်သောသူ ဖြစ်လာခဲ့သည်။ ခုဇ္ဇုတ္တရာအမျိုးသမီးမှ သာမာဝတီအမှူး

ပြုသော မောင်းမ ၅၀၀ တို့အား ပြန်လည်ဟောပြသော သုတ်တော်ပေါင်းမှာ (၁၁၂)

သုတ်ရှိခဲ့သည်။ ထိုတရားတော်များကို သင်္ဂ ါယနာတင်ထေရ်အရှင်တို့က ဣတိဝုတ္တက

ပါဠိတော်နာမည်ဖြင့် ခြောက်ကြိမ်တိုင်တိုင် သင်္ဂ ါယနာတင်ခဲ့ကြသည်။

မြတ်စွာဘုရားရှင် ဇေတဝန်ကျောင်းတော်၌ သီတင်းသုံးတော်မူ၍ ဥပါသိကာအမျိုးသမီး

တို့အား ဧတဒဂ်ရာထူးပေးအပ်ချီးမြင့်သောအခါ ခုဇ္ဇုတ္တရာအမျိုးသမီးအား အကြားအမြင်

ဗဟုသုတများကြသည့် ငါ၏တပည့် ဥပါသိကာမတို့တွင် အသာဆုံး အမြတ်ဆုံး ဧတဒဂ်

ရာထူးကို ပေးအပ်ချီးမြင့်ခဲ့သည်။

နောက်ပိုင်းတွင် သာမာဝတီမိဖုရား နှင့် အပေါင်းတို့မှာ ရှေးအတိတ်ကံဝဋ်ကျွေးတို့ကြောင့်

မြတ်စွာဘုရားရှင်အား သဒ္ဒါတရားနှင့် ဆည်းကပ်ကိုးကွယ်နေသည်ကို မာဂဏ္ဍီမိဖုရားမှ

မဟုတ်မမှန် အမျိုးအမျိုး လုပ်ကြံ၍ ဂုံးတိုက်ရာ ဥတေနမင်းမှ အမျက်ထွက်၍ သတ်မည်

ပြုလုပ်ရာတွင် သာမာဝတီ၏ မေတ္တာတရားကြောင့် မအောင်မြင်ခဲ့သော်လည်း အဆုံးတွင်

မာဂဏ္ဍီ မိဖုရားမှ အကောက်ကြံကာ  မီးရှို့သတ်ခံခဲ့ရလေသည်။

************************

ဆက်လက်ဖော်ပြပါမည်.......................

ကိုးကား............

မင်းကွန်းဆရာတော်ဘုရား၏ မဟာဗုဒ္ဓဝင်၊

S.Dhammika ၏ Middle Land Middle Way

(ဘာသာပြန်) မြတ်ဗုဒ္ဓပွင့်တော်မူရာ မဇ္ဈိမဒေသ (အရှင်ကေလာသ)

တိပိဋကဆရာတော် ဘဒ္ဒန္တဝါယမိန္ဒာဘိဝံသ၏ ဗုဒ္ဓဂယာ ဘုရားဖူးများသို့၊

အရှင်ဝရသာမိ

https://shinsami.blogspot.com