မဇ္ဈိမဒေသမှ လေ့လာစရာ နေရာဒေသများ - ၁၅ (ကောသမ္ဗီ ပြည်)

မာဂဏ္ဍီ မိဖုရား၏ ရန်ငြိုးဖွဲ့ ရန်တိုက်မှု့များ

မြတ်စွာဘုရားရှင် ကောသမ္ဗီပြည်သို့ သူဌေးသုံးဦးတို့၏ ပင့်ဖိတ်လျှောက်ထားချက်အရ သံဃာတော်အပေါင်း ခြံရံတော်မူလျက် ကောသမ္ဗီမြို့သို့ ကြွရောက်တော်မူသောအခါ
မာဂဏ္ဍီ မိဖုရားသည် ဘုရားရှင်အပေါ်၌ ရှေးကရန်ငြိုးဖွဲ့မှု့ကို တုန့်ပြန်လက်စားချေရန်
ရတနာသုံးပါးကို မကြည်ညိုသော သေသောက်ကြူးတို့ကို ခေါ်ကာ တံစိုးလက်ဆောင်များ
ပေး၍ "သင်တို့သည် ရဟန်းဂေါတမကို ဤပုံ ဤနည်း" ဖြင့် ဆဲရေးကြလော့ဟု သင်ပေးကာ
ဆဲရေးခိုင်းခဲ့သည်။
သေသောက်ကြူးတို့သည် မာဂဏ္ဍီ၏ ခိုင်းစေချက်အတိုင်း ဘုရားရှင်ကြွလာသည့်အခါ မကြားဝံ့
မနာသာ ဆဲနည်းအမျိုးမျိုးဖြင့် ဆဲရေးကြကုန်၏။ အရှင်အာနန္ဒာသည် မြတ်စွာဘုရားရှင်ကို
"ဘုန်းတော်ကြီးသော မြတ်စွာဘုရား၊ ဤအရပ်ဒေသမှ လူများသည် အလွန်ပဲ ရိုင်းစိုင်းလှပါသည်
ဤသို့သဘောရှိသောမြို့၌ မနေကြပါနှင့်၊ အခြားမြို့သို့ ကြွကြပါစို့" ဟု လျှောက်ထားလေသော်
မြတ်စွာဘုရားရှင်က "ချစ်သား အာနန္ဒာ၊ ဒီအရပ်က ဆဲရေးလို့ တခြားအရပ်သို့ သွားလျှင်၊ ထိုအရပ်
က လူတွေကကော ဆဲရေးကြလျှင် ဘယ်အရပ်သို့သွားမည်နည်း" ဟု မေးမြန်းလေ၏။ ထိုအရပ်က
ဆဲရေးပြန်လျှင်လည်း ဘယ်အရပ်သို့ သွားမည်နည်းဟု ဆက်တိုက်မေးမြန်းကာ "ချစ်သား အာနန္ဒာ
ဒီနေရာက ဆဲရေးလို့ တခြားအရပ်သို့ ပြောင်းရွှေ့သွားဖို့ရန် မလိုပေ၊ ဒီနေရာမှာဖြစ်တဲ့ ကိစ္စကို
ဒီနေရာမှာပဲ ရှင်းပြီး အဓိကရုဏ်းငြိမ်းမှ တခြားအရပ်သို့ သွားသင့်သည်၊ ချစ်သားအာနန္ဒာ စိုးရိမ်
တော် မမူလင့်၊ အကျင့်ပျက်သူများ မကောင်းသည့်စကား ပြောဆိုနေမှု့ကို ကြံ့ကြံ့ခံနိုင်ဖို့လို
အပ်သည်၊ ဆဲရေးတိုင်းထွားနေသူများသည် ခုနှစ်ရက်မျှသာ ဆဲရေးတိုင်းထွာနိုင်ကြလိမ့်မည်
ခုနှစ်ရက်လွန်သောအခါ မော၍ ရပ်သွားကြလိမ့်မည်" ဟု မိန့်တော်မူ၏။

သာမာဝတီ မိဖုရားအပေါ် ပထမအကြိမ် ရန်တိုက်ခြင်း

မာဂဏ္ဍီမိဖုရားသည် ဘုရားရှင်ကို ထွက်ပြေးအောင် မလုပ်ဆောင်နိုင်သဖြင့် ဘုရားရှင်အား
ထောက်ပံ့လှူဒါန်းနေသော သာမာဝတီဦးဆောင်သော အခြွေရံငါးရာတို့ကို ပျက်ဆီးအောင်
ကြံစည်ပြန်သည်။ သာမာဝတီမိဖုရား နှင့် အခြွေရံ ၅၀၀ တို့သည် သောတာပန်အရိယာများ
ဖြစ်ပြီးကြသော်လည်း ဥတေနမင်းမှာ သာသနာကို မကြည်ညိုသေးသူဖြစ်၍ ဘုရားရှင်ထံသို့
အမြဲသွားရောက်၍ ဘုရားဖူးခွင့် မရကြပေ။ ထို့ကြောင့် မြတ်စွာဘုရားရှင် ကောသမ္ဗီမြို့တွင်း
သို့ ဆွမ်းခံကြွစဉ် မိမိတို့၏ အိမ်ခန်းနံရံများကို အပေါက်ဖောက်၍ ထိုအပေါက်များမှ မြတ်စွာ
ဘုရားရှင်ကို ဖူးမြော်ကြည့်ရှူကြသည်။ မာဂဏ္ဍီမိဖုရားသည် ထိုအကြောင်းအရာကိုသိရှိသွားပြီး
ယခုအခါ ရဟန်းကြီး ဂေါတမအပေါ်၌  ငါပြုရမည့် ရန်ငြိုးကို ပြုရမည်။ ဤမိန်းမတို့သည်လည်း
ရဟန်းဂေါတမ၏ တပည့်မများဖြစ်ကြသည် ဤမိန်းမတို့အပေါ်၌ ငါပြုရမည့် အမှုကို ပြုရမည်ဟု
ကြံစည်လျှက် ဥတေနမင်းကြီးအား သာမာဝတီ နှင့် အခြွေရံ ၅၀၀ တို့သည် အရှင်မင်းကြီးမှ
တစ်ပါး ပြင်ပ၌ လိုလားတောင့်တသူရှိနေကြောင်း၊ အရှင်မင်းကြီး၏ အသက်ကိုပင် လုပ်ကြံ
သတ်ဖြတ်ဖို့ ကြံစည်နေကြာင်း စသည်တို့ကို သုံးကြိမ်တိုင်တိုင် ဂုန်းတိုက်စကား ပြောကြား
လေသည်။ ဥတေနမင်းကြီးသည် မာဂဏ္ဍီ ပြောစကားကို မယုံကြည် လက်မခံချေ။ မာဂဏ္ဍီ
မိဖုရားမှ အရှင်မင်းကြီး မယုံကြည်ပါက ကိုယ်တိုင်သွားရောက် ကြည့်ရှူပါရန် ပြောကြားသဖြင့်
ဥတေနမင်းကြီးက ကိုယ်တိုင်သွားရောက်ကြည့်ရှူ့ရာ အပေါက်များဖေါက်ထားသည်ကို
တွေ့ရ၍ အကြောင်းစုံကို မေးမြန်းရာ အခြွေရံ ၅၀၀ တို့ကလည်း ဘုရားရှင်ကို ဖူးမြော်ရန်
အပေါက်များ ဖေါက်ထားကြောင်း ပြောကြားရာ ဥတေနမင်းကြီးသည် အမျက်မထွက်သည့်
အပြင် အပေါက်များကို ပိတ်စေပြီး နံရံအထက်၌ လေသာပြတင်းပေါက်များကို ပြုလုပ်စေခဲ့သည်။
ဒုတိယအကြိမ် ရန်တိုက်ခြင်း

မာဂဏ္ဍီ မိဖုရားသည် သာမာဝတီ နှင့် အခြွေရံအပေါင်းတို့အား ဒုက္ခရောက်စေရန် လုပ်ကြံမှု
မအောင်မြင်သောအခါ နောက်တစ်မျိုးကြံစည်ပြန်သည်။ "သာမာဝတီ အမှူးပြုသည့် မောင်းမ
ငါးရာတို့သည် အရှင်မင်းကြီးအပေါ် ချစ်ခင်မှု ရှိ/မရှိ စုံစမ်းကြပါစို့၊ ကြက်အရှင် ၈ ကောင်ကို
သူတို့ဆီပို့၍ အရှင်မင်းကြီးအတွက် ချက်ခိုင်းတော်မူပါလော့" ဟု ပြောဆိုလေ၏။ မင်းကြီး
သည် မာဂဏ္ဍီ ဆိုသည့်အတိုင်း ကြက်အရှင် ၈ ကောင်ကို ချက်၍ဆက်ကပ်ရန် သာမာဝတီတို့
အထံသို့ ပို့စေ၏။ သောတာပန် အရိယာဖြစ်ပြီးသူ သာမာဝတီတို့သည် ငါတို့သည် သူများ
အသက်ကို မသတ်ကြပါ၊ ထိုကြက်အရှင် ၈ ကောင်ကို လက်ဖျားဖြင့်ပင် မတို့ထိနိုင်ပါကြောင်း
ငြင်းပယ်ခဲ့ကြသည်။ ထိုအခါ မာဂဏ္ဍီက "ရှိပါစေ အရှင်မင်းကြီး၊ ထိုကြက်တို့ကို ရဟန်းဂေါတမ
အတွက် ချက်ပေးရန် ပို့စေတော်မူပါ"ဟု ပြောဆိုလေ၏။ ဥတေနမင်းသည် မာဂဏ္ဍီပြောဆိုသည့်
အတိုင်းပြုလေ၏။ မာဂဏ္ဍီမိဖုရားသည် လမ်းခရီးအကြား၌ ကြက်တို့ကို သတ်စေ၍ "ဤ ကြက်
တို့ကို ချက်၍ ရဟန်းဂေါတမအား လှူဒါန်းကြပါ" ဟု ပြောဆိုသောအခါ သာမာဝတီ အမှုးပြု
သော မိဖုရားတို့သည် ကြက်သေများဖြစ်သည်ကြောင့် ချက်ပြုတ်၍ ဘုရားရှင်အား လှူဒါန်း
ဆက်ကပ်ကြလေ၏။
မာဂဏ္ဍီမိဖုရားက "အရှင်မင်းကြီး ကြည့်တော်မူပါ အရှင်မင်းကြီးအတွက်ဆို ငြင်းပယ်၍ ရဟန်း
ဂေါတမအတွက်ဆို ဝမ်းမြောက်ဝမ်းသာ လုပ်ဆောင်နေကြပါတယ်"ဟု စသည်ဖြင့် ဂုန်းတိုက်
စကားများ ပြောကြားပြန်၏။ ဥတေနမင်းကြီးသည် အမျက်ထွက်တော်မမူပဲ ဆိတ်ဆိတ်သာ
လျှင် နေခဲ့လေသည်။
တတိယအကြိမ် ရန်တိုက်ခြင်း

ဥတေနမင်းကြီးသည် မင်းဖုရားသုံးဦးတို့၏ နန်းဆောင်များ၌ (၇) ရက်ဆီ လှည့်လည်၍
နေလေ့ရှိသည်။ ဥတေနမင်းကြီးသည် မည်သည့်နေရာသွားသွား ဆင်ချစ်သော စောင်းကို
ယူသွားလေ့ရှိ၏။ တနေ့သော သာမာဝတီမိဖုရား၏ နန်းဆောင်သို့သွားခါနီးအချိန်တွင်
မာဂဏ္ဍီမိဖုရားသည် မင်းကြီးမသိအောင် ထိုစောင်းအတွင်း၌ မြွေဟောက်တစ်ကောင်ကို
မသိအောင်ထည့်ထားပေး၍ စောင်းအပေါက်ကို ပိတ်ထားစေ၏။ ထို့နောက် မင်းကြီးကို
"အရှင်မင်းကြီး သာမာဝတီမိဖုရားသည် ရဟန်းဂေါတမ၏ အသင်းအပင်းဖြစ်သည်၊ အရှင်
မင်းကြီး၏ အပြစ်ကိုသာလျှင် ကြံစည်နေသူဖြစ်သည် သတိနှင့် နေတော်မူပါ" ဟု ပြောဆို
လိုက်လေ၏။ ဥတေနမင်းကြီးသည် သာမာဝတီမိဖုရား၏ နန်းဆောင်၌ (၇) ရက်ကုန်လွန်
စေပြီး၍ တဖန် ခုနှစ်ရက်၌ မာဂဏ္ဍီမိဖုရား၏ နန်းဆောင်သို့ လှည့်လည်ပြန်၏။ မာဂဏ္ဍီ
မီးဖုရားသည် မင်းကြီးလာလျင်ပင် မင်းကြီး၏ လက်မှ စောင်းကိုယူကာ လှုပ်ပြီးလျှင်
"အရှင်မင်းကြီး၊ ဤစောင်းအတွင်း၌ အကောင်တစ်ကောင်ရှိနေသည်"ဟု ဆို၍ မိမိပြုလုပ်
ထားသော မြွေထွက်ရန်အပေါက်ကို ဖယ်ရှားလိုက်လေသည်။ မြွေထွက်လာသောအခါ
စောင်းအတွင်းမှာ မြွေကြီးဟု ဆိုကာ စောင်းကိုပစ်၍ ထွက်ပြေးလေသည်။ မာဂဏ္ဍီမိဖုရား၏
ရန်တိုက်ခြင်း အောင်မြင်သွားလေသည်။ ဥတေနမင်းကြီးသည် ပြင်းစွာအမျက်ထွက်၍
သာမာဝတီ အမှူးပြုသော မိဖုရားတို့ကို ခေါ်စေတော်မူသည်။

သာမာဝတီမိဖုရား၏ မေတ္တာအစွမ်း

သာမာဝတီ မိဖုရားသည် မင်းကြီးအမျက်ထွက်သည်ကို သိ၍ တပည့်ဖြစ်သော အခြွေရံတို့အား
"မင်းကြီးသည် သင်တို့ကို သတ်လို၍ ခေါ်၏။ မင်းကြီးအပေါ်၌ အမျက်မထွက်ကြဘဲ သြဒိဿက
မေတ္တာဖြင့် မင်းကြီးကို မေတ္တာပို့ကြပါ"ဟု တရားသတိပေးလေ၏။ ဥတေနမင်းသည် သာမာဝတီ
မိဖုရားနှင့် မောင်းမငါးရာတို့ကို အစဉ်အလိုက်တန်းစီစေပြီး လေးကြီးကို စွဲတင်၍ အဆိပ်လှူများ
ကို တတ်ပြီးလျှင် ပစ်ဖို့ရန် ချိန်ရွယ်လေသည်။ သာမာဝတီမိဖုရားနှင့် မောင်းမငါးရာတို့သည်လည်း
မင်းကြီးအား စူးစိုက်၍ သြဒိဿကမေတ္တာပို့လွတ်ကြလေသည်။ မင်းကြီးသည် မြှားကို ပစ်ရန်
လည်းမစွမ်းနိုင်၊ ဖယ်ရှားရန်လည်း မစွမ်းနိုင်သဖြင့် ချွေးသီး ချွေးပေါက်များ ကျလျက် တစ်ကိုယ်
လုံး တုန်လှုပ်၍ နေလေ၏။
ထိုအခါ သာမာဝတီမိဖုရားက "အရှင်မင်းကြီး ပင်ပန်းတော်မူနေပါ၏လော"ဟု မေးလျှင်
"ဟုတ်ပေသည် မိဖုရား၊ ငါသည် သူတော်ကောင်းဖြစ်သော သင့်အား ပြစ်မှားမိပေသည်၊
ငါ့အား သက်သာရာရစေပါလော့" ဟု ပြောဆိုသောအခါ "ကောင်းပါပြီ မင်းကြီး မြှားကို
မြေကြီး၌  ပစ်ပါလော့" ဟု ပြောဆိုလေ၏။ မင်းကြီးသည် မိဖုရားဆိုသည့်အတိုင်း ပြုလေ၏။
သာမာဝတီမိဖုရားသည် မင်းကြီး၏ မြားသည် လွတ်စေသတည်းဟု အဓိဌာန်လိုက်သော
အခါ ထိုခဏမှာပင် မြှားသည် မင်းကြီး၏ လက်မှ လွတ်ထွက်သွားလေသည်။
ထို့နောက် ဥတေနမင်းကြီးသည် သာမာဝတီမိဖုရား၏ ရှေ့၌ ဒူးတုတ်လျက် "ရှင်မိဖုရား၊
ငါ့အား သည်းခံပါလော့၊ ငါသည် ကုန်းချောသူ မာဂဏ္ဍီ၏ စကားကို မစူးစမ်း မဆင်ခြင်ပဲ
ယုံမှတ်ပြီး ဤအမှုကို ပြုမိပေသည်" ဟု တောင်းပန်ဝန်ချလေ၏။ သာမာဝတီ မိဖုရား
ကလည်း "သည်းခံပါသည် အရှင်မင်းကြီး" ဟု ခွင့်လွတ်စကား ပြောကြားသောအခါ
ဥတေနမင်းကြီးသည် ကောင်းပါပြီ ရှင်မိဖုရား ငါသည်လည်း ယနေ့မှစ၍ ရှင်မိဖုရားတို့၏
အလိုအတိုင်း မြတ်စွာဘုရားအား အလှူဒါနကို ပေးလှူကြပါလော့၊ ကျောင်းတော်သို့
သွား၍ တရားနာကြပါလော့၊ ယနေ့မှ စ၍ သင်တို့အား အစောင့်အရှောက်ကို ငါပေးအံ့"
ဟု ပြောဆိုလေ၏။

သာမာဝတီမိဖုရားနှင့် အခြွေအရံများ မီးတိုက်၍ အသတ်ခံရခြင်း

မာဂဏ္ဍီမိဖုရားသည် အမျိုးမျိုးသော ကုန်းတိုက်မှုများ မအောင်မြင်သောအခါ တနေ့သ၌
ဥတေနမင်းကြီး ဥယျာဉ်သို့ အပျော်အပါးသွားသောအချိန်တွင် ဦးလေးဖြစ်သူ စူဠမာဂဏ္ဍီ
အား သာမာဝတီတို့ နေထိုင်သည့် နန်းဆောင်ကို မီးတိုက်ခိုင်းခဲ့သည်။ သာမာဝတီမိဖုရား
နှင့် မောင်းမငါးရာတို့သည် တချိန်တည်းမှာ မီးလောင်၍ သေဆုံးကြကုန်သည်။ မီးလောင်
နေစဉ်အတွင်း ဝေဒနာကမ္မဌာန်းကို နှလုံးသွင်းကြရာ တချို့မှာ သကဒါဂါမ်၊ တချို့မှာ
အနာဂမ်အရိယာများ ဖြစ်သွားခဲ့ကြပြီး သေလွန်သွားသောအခါ ဗြဟ္မပြည်၊ နတ်ပြည်
အသီးသီးသို့ ရောက်ရှိသွားကြသည်။

သာမာဝတီမိဖုရား၏ ရှေးအကုသိုလ်ကံ

သာမာဝတီမိဖုရားလောင်း နှင့် အခြွေအရံအမျိုးသမီးငါးရာတို့သည် ဘုရားပွင့်တော်မမူမီ
တစ်ခုသော ဘဝ၌ ထိုမိန်းမတို့နှင့် ဂင်္ဂ ါမြစ်အတွင်း၌ ရေချိုးကြရာ ရေချိုး၍အပြီး ကမ်းပေါ်
တက်သောအခါ လွန်စွာချမ်းအေး၍ အနီးနားတွင် ရှိသော ပစ္စေကဗုဒ္ဓါသီတင်းသုံးနေသော
သစ်ရွက်မိုးသောကျောင်းကို မြင်ရ၍ အထဲတွင် ပစ္စေကဗုဒ္ဓါရှိ/မရှိကို မစူးစမ်းမဆင်ခြင်ဘဲ
ပြင်ပမှ မီးတိုက်၍ မီးလှုံကြသည်။ သစ်ရွက်များ မီးလောင်ပြာကျသွားသောအခါ ပစ္စေက
ဗုဒ္ဓအရှင်မြတ်ကို တွေ့သွားပြီး ဤပစ္စေကဗုဒ္ဓအရှင်မြတ်သည် ငါတို့မင်းကြီး ကိုးကွယ်
လှူဒါန်းနေသော အရှင်ဖြစ်သည်၊ ဤပစ္စေကဗုဒ္ဓါ ပျံလွန်တော်မူသည်ကို မြင်လျှင် မင်းကြီး
သည် ငါတို့ကို ပြင်းစွာအမျက်ထွက်လိမ့်မည်၊ ယခုအခါ မင်းကြီးမသိသေးမီ အစပျောက်
အောင် မီးသဂြို ၤလ်မှ ဖြစ်ပေမည်ဟု ဆိုကာ ထင်းများကို ရှာလျှက် မီးတိုက်ကြလေသည်။
ထိုထင်းများ ကုန်သွားသောအခါ ပစ္စေကဗုဒ္ဓါအရှင်မြတ်သည် နိရောဓသမာပတ်ထတော်
မူပြီး ထိုမိန်းမများ၏ ရှေ့၌ပင် သင်္ကန်းကိုခါလျက် ကောင်းကင်သို့ ပျံတက်သွားလေသည်။
အစ ပထမ မီးရှို့မှုတွင် စေတနာမပါသဖြင့် ကံမထိုက်သော်လည်း ဒုတိယအကြိမ်တွင်
စေတနာဖြင့် ပြုလုပ်ခြင်းကြောင့် ကံထိုက်ကာ ထိုမကောင်းမှု အကုသိုလ်ကံကြောင့်ပင်
ငရဲ၌ ကျရောက်ကျပြီးလျှင် ယခုဘဝတွင် ဝိပါက်အကြွင်းအကျန်အနေဖြင့် မီးလောင်တိုက်
သွင်းခံရကာ သေဆုံးခြင်းသို့ ရောက်ရခြင်းဖြစ်သည်။
နောင်သောအခါ မြတ်စွာဘုရားရှင်သည် ဇေတဝန်ကျောင်း၌ သီတင်းသုံးနေတော်မူစဉ်
ဥပါသိကာအမျိုးသမီးတို့ကို ဧတဒဂ်ရာထူး အပ်နှင်းရာတွင် ဘုရားရှင်၏ တပည့်မတို့တွင်
သာမာဝတီ သည် မေတ္တာဈာန်ဖြင့် နေလေ့ရှိသောသူတို့တွင် အသာဆုံး အမြတ်ဆုံး
ဧတဒဂ်ရာထူးကို အပ်နှင်းခံရလေသည်။

မာဂဏ္ဍီ ၏ နိဂုံး

ဥတေနမင်းကြီးသည် အဘယ်သူသည် သာမာဝတီ မိဖုရားကို မီးတိုက်၍ သတ်သနည်းဟု
တရားခံကို ရှာသောအခါ မာဂဏ္ဍီမိဖုရား ပြုလုပ်သည်ကို သိရှိရ၍ မာဂဏ္ဍီအား ရှေ့တော်
မှောက်သို့ ခေါ်စေပြီး "မာဂဏ္ဍီမိဖုရား ငါပြုလုပ်ရမည့် အမှုကို သင်သည်ပြုလုပ်အပ်ပေပြီ၊
ငါ့အားအမျိုးမျိုးသတ်ဖို့ ကြံစည်အားထုတ်နေသော သာမာဝတီ ကို သင်က သတ်ပေးလေ
သည်၊ သင့်အပေါ်၌ ငါသည် အလွန်ကြည်ညိုလှပေသည်။ သင့်အား ဆုလာဒ်စည်းစိမ်
ကို ငါပေးလိုသည် သင်၏ဆွေတော်မျိုးတော်များကိုလည်း ခေါ်တော်မူပါလော့" ဟု
ပရိယာယ်ဖြင့် ပြောဆိုလေ၏။
မာဂဏ္ဍီမိဖုရားသည် ဥတေနမင်းကြီး၏ စကားကို ကြားရပြီး အလွန်ဝမ်းမြောက်ဝမ်းသာ
ဖြစ်လျက် ဆုလာဒ်ရမည်ဆိုသည့်အတွက်ကြောင့် ဆွေမျိုးမဟုတ်သူများကိုလည်း ဆွေမျိုး
ပြုလုပ်ကာ ခေါ်စေ၏။ မာဂဏ္ဍီ နှင့် သူ၏ဆွေမျိုးများ အားလုံးစုံလင်သောအခါ နန်းရင်
ပြင်၌ တွင်းများကို တူးစေပြီး ထိုတွင်းများ၌ ဦးခေါင်းတို့ကို ချန်ပြီး မြေမြှုတ်ကာ ဦးခေါင်း
တို့ကို ရိုက်ခွဲလျက် သံထွန်ယက်တို့ဖြင့် ရက်ရက်စက်စက် သတ်ဖြတ်လေ၏။ မာဂဏ္ဍီ
မိဖုရားကိုလည်း အရှင်လတ်လတ် အသားများကို လှီးဖြတ်စေ၍ မုန့်ကြော်သောအိုး၌
ကြော်စေပြီး မာဂဏ္ဍီ မိဖုရားကို စားခိုင်းစေသည်။ ထို့နောက် အပိုင်းပိုင်း ခုတ်ဖြတ်၍
သတ်ဖြတ်စေ၏။ မာဂဏ္ဍီ၏ မကောင်းမှုအကုသိုလ်ကံသည် ဘဝမကူးပဲ မျက်မှောက်
ဘဝမှာပင် ရက်ရက်စက်စက် သတ်ဖြတ်ခံရကာ ဘဝနိဂုံးအဆုံးသတ်သွားလေသည်။
ဆက်လက်ဖော်ပြပါမည်.......................

ကိုးကား............
မင်းကွန်းဆရာတော်ဘုရား၏ မဟာဗုဒ္ဓဝင်၊
ဦးသြဘာသ(သာဝတ္ထိ) ၏ မဇ္ဈိမဒေသမှ သမိုင်းရုပ်ကြွင်းပုံရိပ်လွှာများ၊
တိပိဋကဆရာတော် ဘဒ္ဒန္တဝါယမိန္ဒာဘိဝံသ၏ ဗုဒ္ဓဂယာ ဘုရားဖူးများသို့၊

အရှင်ဝရသာမိ

https://shinsami.blogspot.com